«Արմէնփրես»` վկայակոչելով «Ակօս» շաբաթաթերթը, կը հաղորդէ, որ Հրանդ Տինքի յիշատակը
ոգեկոչելու նպատակով Թաքսիմի հրապարակին վրայ հաւաքուած են հազարաւոր մարդիկ: Ներկաները
իրենց առջեւ պահած են մեծ պաստառ մը` «Առերեսուեցէ՛ք Հրանդի հետ, Ցեղասպանութեան հետ»
վերտառութեամբ: Քայլարշաւը գլխաւորած են Տինքի ընտանիքը, Ժողովուրդներու ժողովրդավարական
կուսակցութեան համանախագահներ Սելահեթթին Տեմիրթաշ եւ Ֆիկեն Եիւքսեքտաղ, ընդդիմադիր Հանրապետական
ժողովուրդի կուսակցութենէն երեսփոխան Ումութ Օրան, Սեզկին Թանրըքուլու, Շաֆաք Փավէյ:
Մասնակիցներու շարքին էր նաեւ Կեզիի դէպքերուն ժամանակ սպաննուած 15-ամեայ Պերքին Էլվանի
ընտանիքը: Ներկաներէն ոմանք իրենց ձեռքերով բռնած են պաստառներ «Այս Հրանդ Տինքի պողոտան
է, այս Հրանդ Տինքի քաղաքն է, այս Հրանդ Տինքի երկիրն է» եւ «1915-էն մինչեւ Հրանդ. կոտորածը
կը շարունակուի» գրութիւններով: Հաւաքին մասնակիցները քայլարշաւ կատարած են եւ հաւաքուած
«Ակօս»-ի խմբագրատան առջեւ` այն վայրին մէջ, ուր ութ տարի առաջ դաւադիր կերպով սպաննուեցաւ
Տինք: Խմբագրատան մօտ եւս տեղադրուած են պաստառներ «Բոլորս Հրանդ ենք, բոլորս հայ ենք»,
«Քանի տակաւին մենք չենք ըսած, այս դատը պիտի չաւարտի» վերտառութիւններով: Յիշեցնենք,
որ Տինք սպաննուած է 19 յունուար 2007-ին: