Në Evropë, 20 celula të heshtura. Në Niger, digjen shtatë kisha
Alarmi kundër terrorizmit mbetet i lartë në gjithë Evropën. Ndërkaq, në Niger, janë
djegur shtatë kisha, pas dhunës, që shpërtheu si protestë kundër publikimit të karikaturave
të reja nga e përjavshmja satirike franceze “Charlie Hebdo”. Sot, policia përdori
gazin lotsjellës për të shpërndarë rreth njëmijë demonstrues në kryeqytetin Niamey.
Gjatë 48 orëve të fundit, protestat u kanë kushtuar jetën 4 vetëve, ndërsa manifestuesit
kanë djegur shtatë kisha, kanë plaçkitur banesat e disa të krishterëve e kanë sulmuar
një qendër kulturore franceze. Në Evropë, shërbimet e sigurimit njoftojnë se mund
të jenë deri në 20, celulat xhihadiste të heshtura, që janë gati të veprojnë në Francë,
Gjermani, Belgjikë e Holandë. Veçanërisht, nga Belgjika, njoftohet se celula e zbuluar
në Vervier udhëhiqet nga një person me origjinë marokene, aktualisht në Greqi, që
ka luftuar në Siri përkrah milicëve të ISIS-it. Në Itali, ministri i jashtëm, Gentiloni,
lajmëroi se “alarmi terrorizëm është në nivelin 7 në një shkallë prej 10 nivelesh”.Lista
e të dyshuarve përmban 59 vetë, por mëse 100, vëzhgohen nga afër. Që nga dhjetori,
janë përjashtuar nga vendi nëntë vetë, për arsye sigurie.