Papa në Manila denoncon: korrupsioni plagë shoqërore që rëndon mbi të varfrit
Çdo i krishterë duhet të jetë i ndershëm, por edhe të krijojë ato, që Papa Françesku
i quajti “rrethe ndershmërie”. Ati i Shenjtë, në ditën e pestë të udhëtimit të tij
apostolik në Sri Lankë e Filipine, kremtoi sot meshën në katedralen e Manilës, kushtuar
klerit të vendit. Para 2 mijë të pranishmwve - rregulltarë, meshtarë e seminaristë
e murgesha - Papa, pa letër, nënvizoi sërish me forcë se janë të varfërit në qendër
të Ungjillit e u bëri thirrje bashkësive të krishtera t’u qëndrojnë pranë të përjashtuarve
nga shoqëria. Nuk mungoi të theksojë edhe një herë bukurinë e martesës së krishterë. “Të varfërit
janë në qendër të Ungjillit, janë zemra e Ungjillit… Nëse i largojmë të varfërit nga
Ungjilli, nuk mund ta kuptojmë mesazhin e Krishtit”.
Papa iu drejtua rregulltarëve,
duke i quajtur “ambasadorë të Krishtit”. “Ne – nënvizoi – duhet të jemi të parët,
që e refuzojmë perspektivën e kësaj bote, për t’i dhënë mundësi Fjalës së Zotit të
na shndërrojë”. Ati i Shenjtë u kërkoi të pranishmëve të mos kenë frikë nga ndryshimet
e të mos bëjnë kompromise me mendësinë e kësaj bote. Ekziston rreziku i rënies në
një lloj materializmi, që shprehet përmes vetëkënaqësisë për çfarë jemi e çfarë përfaqësojmë
si të krishterë, gjë që na bën të largohemi nga vëllezërit e motrat më të varfëra.
Duhet të jemi ne vetë të varfër, theksoi Papa, për t’i kuptuar e për t’u dhënë përgjigjen
e duhur pabarazive shoqërore: “Kisha në Filipine duhet të njohë e të luftojë
shkaqet e pabarazisë e të padrejtësisë, thellësisht të rrënjosura, që e njollosin
fytyrën e shoqërisë filipinase, në kundërshtim të hapur me mësimet e Krishtit”. Ungjilli,
u kujtoi Papa gjithë të krishterëve, i kërkon secilit të jetojë ndershmërisht e të
angazhohet për të mirën e përbashkët. Bashkësitë e krishtera duhet të krijojnë rrethe
ndershmërie, rrjete solidariteti, që mund të shtrihen në gjithë shoqërinë e ta shndërrojnë
atë përmes dëshmisë profetike. Ati i Shenjtë i kujtoi Kishës e vendit, pasurinë kulturore,
trashëguar nga e kaluara: “Ndërsa Kisha në Filipine përgatitet për 500 vjetorin
e ungjillëzimit, jemi mirënjohës për trashëgiminë e shumë ipeshkvijve, meshtarëve
e rregulltarëve të brezave të shkuar. Ata u përpoqën jo vetëm të predikojnë Ungjillin
e të ndërtojnë Kishën e këtij vendi, por edhe të farkëtojnë një shoqëri të frymëzuar
nga mesazhi ungjillor i dashurisë, i faljes dhe i solidaritetit për të mirën e përbashkët”. Papa
Françesku u kërkoi gjithë të krishterëve ta vazhdojnë këtë vepër, por sidomos iu drejtua
meshtarëve dhe seminaristëve të rinj: “Qëndrojuni pranë të rinjve, të cilët,
duke jetuar në mesin e një shoqërie të rënduar nga varfëria e nga korrupsioni, shkurajohen,
tundohen të heqin dorë nga gjithçka, të braktisin shkollën e të jetojnë rrugëve. …Shpalleni
bukurinë dhe të vërtetën e martesës së krishterë në një shoqëri, që tundohet nga mënyrat
konfuze për ta jetuar seksualitetin, martesën dhe familjen. Siç e dini, këto realitete
sulmohen gjithnjë e më tepër nga forca të fuqishme, që kërcënojnë ta shpërfytyrojnë
planin krijues të Zotit e të tradhtojnë vlerat, që kanë frymëzuar e i kanë dhënë formë
çdo gjëje të bukur në kulturën tuaj. Kultura filipinase është plazmuar nga krijimtaria
e fesë”.