Papa Françesku u bëri një vizitë të papritur fëmijëve të rrugës në Manila
Jashtë programit, siç ndodh tashmë shpesh me Papën Françesku, Ati i Shenjtë shkoi
për vizitë në një qendër për fëmijët e rrugës në Manila, menjëherë pas përfundimit
të meshës me klerin filipinas. Drejtori i Sallës së Shtypit Federiko Lombardi sqaroi
se takimi me rreth 320 fëmijët zgjati gjysëm ore, qe mallëngjyes e u shoqërua me këngë,
valle, përqafime dhe shkëmbime dhuratash të thjeshta. Duart e vogla i dhuruan Atit
të Shenjtë një shtatore të Zojës prej druri, kopje e asaj të qendrës; një fotografi
ku shihej i Shenjtnueshmi Sakrament në mesin e plehrave, vënë aty për t’u adhuruar
nga një grup gërmuesish të plehrave; si edhe një mozaik, realizuar nga njëri prej
fëmijëve, duke bashkuar copëza letrash me ngjyrë. Në qendër janë
strehuar aktualisht rreth 20 fëmijë, për të cilët kujdeset atë Mathieu, një meshtar
francez. Papa Françesku foli për këtë takim shumë emocionues edhe gjatë fjalës për
familjet e mbledhura pasdite (me orën e Filipines) në Pallatin e Sportit të Manilës.
Qe rasti për të ritheksuar vlerat familjare: “Sot u mallëngjeva shumë pas meshës,
kur shkova për vizitë në një shtëpi fëmijësh të vetmuar, pa familje.Njerëzit e Kishës
punojnë që kjo shtëpi të jetë familje për ta! Kjo do të thotë t’i japësh, profetikisht,
kuptim familjes. Mund të jeni ju vetë të varfër në kuptimin material, por keni kaq
shumë dhurata për të ofruar kur u jepni njerëzve Krishtin dhe bashkësinë e Kishës
së Tij. Mos e fshihni fenë, mos e fshihni Jezusin, por çojani botës e dëshmoni jetën
tuaj familjare!”