Візіт Папы на Філіпіны пройдзе пад знакам сціпласці
Мэта апостальскага
падарожжа Францішка на Філіпіны – выказаць салідарнасць і спачуванне бедным і ахвярам
прыродных катаклізмаў, таму ён адмовіўся ад дарагога прыёму, падзяліўся ў інтэрв'ю
Ватыканскаму радыё арцыбіскуп Манілы кардынал Луіс Тагле. “Гэта характэрная рыса папскіх
візітаў. Тое самае было і ў Карэі. Карэйскія біскупы сказалі нам, філіпінскім, якія
таксама прысутнічалі падчас таго візіту, што Папа не будзе задаволены эфектнай сустрэчай.
Нават папскі алтар будзе сведчыць пра ўмеранасць і прастату, уласцівую Святому Айцу”,
сказаў іерарх. На думку арцыбіскупа, філіпінцам, вельмі шчодрым ў выразе сваіх пачуццяў,
будзе нялёгка стрымацца, але яны павінны будуць памятаць пра бедных і галодных, на
дапамогу якім пойдуць сэканомленыя падчас папскага візіту сродкі.
“Штодзённымі
тайфунамі і землятрусамі” назваў арцыбіскуп Манілы беднасць і карупцыю. Ён падзяліўся
сваімі ўражаннямі ад наведвання прытулку для вулічных дзяцей, бацькі якіх у роспачы
адпраўляюць іх на вуліцы ў надзеі, што яны трапяць у прытулак, дзе ў іх будзе ежа
і дах над галавой.
У Маніле падчас сустрэчы з семьямі і моладззю папа Францішак
пачуе гісторыі сем’яў, якія пазналі цяжкасці і выпрабаванні. Кардынал Тагле спадзяецца,
што Святы Айцец не толькі выкажа ім сваю падтрымку, але і сам, дзякуючы гэтым бедным
людзям, умацуецца ў веры. Гэта будзе сустрэча, поўная болю. Але ў хрысціянскай веры
пасля пакут, заўсёды наступае ўваскрасенне, нагадаў арцыбіскуп Манілы.