Кс. Ламбардзі падзяліўся ўражаннямі ад візіту Папы ў Шры-Ланку
Кіраўнік Залы Друку
Апостальскай Сталіцы прызнаўся, што вельмі ўражаны цяплынёй прыёма, які жыхары Шры-Ланкі
аказалі папе Францішку. Дарога з аэрапорта Каломба да горада склала каля 28 км і на
працягу ўсяго маршрута Пантыфіка віталі людзі: каля 200-300 тыс. чалавек – не толькі
католікі, якія ў Шры-Ланцы з’яўляюцца меншасцю, але таксама прадстаўнікі іншых рэлігій
і канфесій, расказаў ён. Кс. Ламбардзі заўважыў, што ў Шры-Ланцы Каталіцкі Касцёл
мае асаблівую ролю, бо сярод вернікаў ёсць як тамілы, так і сінгалы – прадстаўнікі
народаў, якія яшчэ некалькі гадоў таму супрацьстаялі адно аднаму ў крывавай грамадзянскай
вайне. Касцёл, такім чынам, выконвае ў краіне ролю “маста” і спрыяе прымірэнню, лічыць
езуіт.
Кіраўнік Залы Друку распавёў, што падчас візіту ў Шры-Ланку Яна Паўла
ІІ, не атрымалася арганізаваць міжрэлігійную сустрэчу. Прычына гэтага была ў тым,
што будысты, якія складаюць 70% мясцовага насельніцтва, адмовіліся ў ёй удзельнічаць.
Сёлета, аднак, у міжрэлігійнай сустрэчы з Пантыфікам прынялі ўдзел каля 600 будыскіх
манахаў. Некаторыя з іх прызнаваліся ў вялікай сімпатыі да папы Францішка і выказалі
асабістае жаданне сустрэцца з ім.
Кс. Ламбардзі заўважыў, што падчас праезду
Святога Айца па вуліцах Каломба, тут прысутнічала вялікая колькасць упрыгожаных сланоў.
Некаторыя з іх пастаянна пражываюць на тэрыторыі будыскіх храмаў, падкрэсліў ён.
Кіраўнік
Залы Друку Святога Пасаду выказаў перакананасць, што візіт Пантыфіка ў Шры-Ланку прынясе
свае плёны: “не толькі ў гэтыя дні, але і на працягу гадоў і не толькі для Касцёла,
але і для ўсяго грамадства”.