Historia e Shenjtërores mariane është e gjatë, katërshekullore. Zanafillën e ka në
vitin 1544, kur mbreti i Jaffna-s, Sankili, masakroi 600 të krishterë në Mannar (të
kthyer në krishterim nga portugezët, që zbarkuan në Ceilon më 1505), duke pasur frikë
nga shtrirja e ndikimit portugez. Disa besimtarë, që mundën të shpëtojnë nga masakra,
ngritën, në zemër të xhunglës, një vend të vogël lutjeje, duke vendosur aty shtatoren,
që gjindet edhe sot e kësaj dite në Shenjtërore. Në vitin 1583, të krishterë të tjerë,
të ikur përsëri nga Mannar, nisën të ndërtojnë kisha në viset fqinje. Një prej tyre
u ngrit në Mantai, e është “shtëpia” e parë ku nisi “të banojë” Shtatorja e Zojës
së Madhu. Holandezët, si zbarkuan në Ceilon më 1656, nisën një persekutim të egër
të katolikëve. Tridhjetë familje katolike, duke kërkuar strehë nga fshati në fshat
e duke e mbartur shtatoren me vete në këtë rravgim të vështirë, më 1670 u vendosën
në Maruthamadhu, vend ku sot ngrihet Shenjtërorja. Katolikë të tjerë të ikur nga persekutimi
holandez, u mblodhën në këtë vend: ndërmjet tyre ishte edhe një grua portugeze, Helena,
e cila nisi ndërtimin e një kishe të vogël, kushtuar Zojës së Madhu. Fama e Zojës
u përhap në mbarë Ceilonin, ngaqë përmes ndërmjetësimit të saj ndodhën shërime të
mrekullueshme. Shumë njerëz, të kafshuar nga gjarpërinjtë me helm vdekjeprurës, shpëtuan
gjallë mrekullisht. E kështu Zoja nisi të njihej si shpëtimtare e pajtore e banorëve.
Me ardhjen e atë Jozef Vaz, në vitin 1687, në Madhu nisi një lulëzim i jashtëzakonshëm
i katolicizmit. Vendi u shndërrua shpejt në qendër misionare. Ndërtesa e sotme nisi
të ndërtohej më 1872, me vendosjen e gurit të parë të Shenjtërores. Legati papnor
e kurorëzoi shtatoren më 1924, në emër të Papës Piu XI. Kisha u kushtuar më 1944. Shenjtëroja
e Zojës së Madhu ka qenë e vijon të jetë vend lutjeje, i respektuar e i ndjekur nga
besimtarët katolikë e të feve të tjera. Pavarësisht nga kjo, zona e shenjtërores u
bërë shesh beteje gjatë ndeshjeve ndërmjet rebelëve tamil e forcave qeveritare. Ipeshkvijtë
vendas arritën ta bëjnë Madhu-në zonë e çmilitarizuar, duke garantuar sigurinë e shtegtarëve
e të refugjatëve të shumënumërt, që u strehuan gjatë viteve në trojet rreth shenjtërores.
Më 1990, të160 hektarët që rrethojnë Shenjtëroren, strehuan mijëra të shpërngulur
nga lufta, duke u bërë kamp i mirëfilltë refugjatësh, i njohur si i tillë edhe nga
palët në konflikt. Në prill 2008 iu dorëzua përsëri dioqezës së Mannar dhe u rihap
për kultin në dhjetor 2010.