Pak 22 vitesh, më në fund Misionaret e Dashurisë, Motrat Rregulltare të themeluara
nga Nënë Tereza, marrin miratimin e pronës dhe të objekteve që përdorin për misionin
e tyre bamirës, në shërbim të popullsisë, sidomos të më të varfërve, pa dallim pa
dallim. Me datën 13 janar, ministria Kodheli shkoi personalisht në Pukë për këtë
çështje, ku në praninë e motrave Misionare të Nënë Terezës, ipeshkvit katolik të Sapës,
imzot Lucjan Avgustinit e famullitarit dom Giovanni Fiochi, dorëzoi Akt-dhurimin e
objektit në fjalë, dhuruar motrave Misionare të Bamirësisë Nënë Tereza. Më hollësisht
të ndjekim shërbimin e Violeta Marashit... Merr
fund çështja e zgjidhjes së pronës së shtëpisë së Motrave të Nënë Terezes në Pukë.
Prej vitesh motrat e kësaj bashkësie iu ishin drejtuar institucioneve dhe organeve
përkatëse me kërkesat e herëpas-hershme për kalimin në pronësi të objektit dhe sheshit
të ish – Spitalit Ushtarak dhe Shkolla e lirë ushtarake, në qytetin e Pukës, që me
ardhjen e motrave iu ishte dhënë për vendbanim, por asnjëherë nuk morën përgjigjen
e duhur. Ndërsa kërkesa e fundit shkruar në shtator të vitit 2014, drejtuar Kryeministrit
Rama dhe ministres së Mbrojtjes Kodheli, ka qenë fatsjellëse, ku falë miratimit nga
kjo qeveri, pas 22 viteve u bë i mundur Akt-Dhurimi i kësaj prone dhe objekteve që
ndodhen në të. Në ceremoninë e organizuar me këtë rast, me datën 13 janar, udhëtoi
drejt Pukës vetë ministria Kodheli, ku në praninë e motrave të Nënë Terezes, Ipeshkvit
të Sapës, Imzot Lucjan Avgustinit dhe famullitarit dom Giovanni Fiochi, dorëzoi Akt-dhurimin
e objektit në fjalë, dhuruar motrave Misionare të Bamirësisë Nënë Tereza. Përmes fjalëve
të rastit, znj. Kodheli shprehi mirënjohjen e saj për praninë e Motrave në mes këtyre
maleve, që me misionin e tyre të dashurisë dhe bamirësisë arrijnë të ngrohin zemrat
e njerëzve të kësaj zone duke ushtruar aktivitetin e tyre shpirtëror dhe human. “Meriton
shumë më tepër edhe kisha që shërben në këtë vend të ashpër nga natyra, por jo nga
bujaria dhe devotshmëria. Unë kam pasur nderin e jashtëzakonshëm dhe fatin e madh
ta takoj të paktën dy herë në jetën time Nënë Terezën. Është detyrimi im si ministre
e qeverisë që unë përfaqësoj, ka vijuar më tej ministria Kodheli, që të mundësoja
shumë pak për një dokument, i cili duhet të ishte marrë dekada më parë. Edhe Imzot
Avgustini falenderoi Ministren e Mbrojtjes për angazhimin e saj të drejtpërdrejtë,
që e nxori këtë çështje tepër të qartë nga sirtarët e kësaj ministrie për t’ia përcjellë
Këshillit të Ministrave për miratim, duke i dhënë kështu dritë një herë e përgjithmonë.
Ndërsa për vetë motrat e Nënë Terezes, siç u shprehen edhe ato vetë, ky vendim i qeverisë
iu dha fund shqetësimeve tona të mëdha që shpesh-herë na ndikonin edhe në mbarëvajtjen
e misionit tonë. Shprehim mirënjohjen tonë për gjithë mbështetjen që na dhatë në këtë
drejtim dhe lutemi për ju thanë motrat. Më pas, ministrja Kodheli i dorëzoi përfaqësueses
së misionit “Nënë Tereza” në Pukë, dokumentin hipotekor me nr. 13, datë 9.12.2014,
nëpërmjet të cilit objekti tashmë figuron në pronësi të këtij misioni bamirës. Pas
këtij akti, ministrja e Mbrojtjes Kodheli dhe monsinjor Lucian Avgustini zbuluan pllakën
e vendosur në hyrje të këtij institucioni fetar me këtë mbishktrim: “Dhuratë e Ministres
së Mbrojtjes për “Motrat e Nënë Terzës” me falënderimet për veprën e tyre të jashtëzakonshme.
Zoti ju bekoftë! Mimi Kodheli”. Misioni i motrave të Nënë Terezes në qytetin e
Pukës daton që nga 16 korriku i vitit 1992. Një muaj më vonë, më 15 gusht po të këtij
viti ka qenë e pranishme edhe vetë e Lumja Nënë Tereza e cila vendosi përfundimisht
misionin e motrave të saj në këtë qytet. Që nga ajo kohë, motrat ushtrojnë plotësisht
misionin e tyre duke iu përmbajtur rregullave të kongregatës në ndihmë ndaj më të
varfërve në mbarë zonën e Pukës.