Святы Айцец прыняў на аўдыенцыі дэлегацыю езідскіх лідэраў
Папа Францішак прыняў
на аўдыенцыі 8 студзеня 2015 г. дэлегацыю супольнасці езідаў, якую ўзначалілі яе лідэр
Тахсін Саід Алі Бег і найвышэйшы духоўны кіраўнік гэтай этнаканфесійнай групы Шэйх
Като. Абодва прыбылі ў Ватыкан з іракскага Курдыстана. У склад дэлегацыі ўваходзілі
таксама езідскія лідэры з Паўночнага Іраку, Грузіі і дыяспары ў Германіі. Яны падзякавалі
Святому Айцу – якога назвалі “айцом бедных” – за падтрымку езідаў у час пераследу
і пакут, а таксама паінфармавалі аб стане амаль 5 тыс. жанчын, прымушаных да рабства
баевікамі “Ісламскай дзяржавы”. Падчас сустрэчы падкрэсліваліся добрыя адносіны паміж
езідамі і хрысціянамі і салідарнасць паміж імі, распавёў кіраўнік Залы Друку Апостальскай
Сталіцы.
Паводле кс. Ламбардзі, Пантыфік запэўніў сваіх гасцей у духоўнай
блізкасці і падтрымцы ў час выпрабаванняў, жадаючы, каб як мага хутчэй магла ўсталявацца
справядлівасць і былі створаны ўмовы для свабоднага і мірнага жыцця езідаў, і іншых
меншасцяў, што сталі аб’ектамі дыскрымінацыі і насілля. Сустрэча працягвалася каля
30 хвілін і праходзіла ў прыватнай бібліятэцы Пантыфіка ў Апостальскім палацы.