«Հուտա» ձիւնամրրիկը կը հարուածէ Միջին Արեւելքի երկիրները։
«Հուտա» ձիւնամրրիկը երէկ հասաւ Միջին Արեւելք` ողողելով շրջանի երկիրները: Դամասկոսի
մէջ երթեւեկը ընդհատուեցաւ եւ դպրոցները երկու օրով փակ յայտարարուեցան: Կազայի եւ
Այսրյորդանանի մէջ պաղեստինեան իշխանութիւնները արտակարգ դրութիւն յայտարարեցին: Պաղեստինցի
նորածին մը զոհ գնաց կրակարանի ծուխին յառաջացուցած շնչահեղձութեան պատճառով` Թոլքարըմ
գաղթակայանին մէջ: Ծովու մակերեսէն 800 մեթր բարձրութեան վրայ գտնուող Երուսաղէմի
մէջ երկու մայրուղիներ եւ հարիւրաւոր դպրոցներ փակուեցան իբրեւ նախազգուշութիւն: Սուէզի
եւ Սինայի հարաւը հինգ նաւահանգիստներ փակուեցան «Հուտա» ձիւնամրրիկին պատճառով, որ Լիբանանի
մէջ կը կոչուի «Զէյնա», իսկ այլ երկիրներու մէջ` «Փոթորիկներու մայր»: Յորդանանի մէջ
պաշտօնական հաստատութիւններն ու դպրոցները փակ յայտարարուեցան եւ պատկան մարմինները զօրաշարժի
մատնուեցան` կանխարգիլելու «Հուտա-Զէյնա» ձիւնամրրիկի հարուածներուն հետեւանքները: