Տօն Աստուածայայտնութեան Տ.Մ. Յիսուսի Քրիտոսի և Ջրօրհնէք
Երեքշաբթի 06 Յունուար 2015-ի առաւօտեան ժամը 10:30-ին, մեր Տիրոջ Յիսուսի Քրիստոսի Աստուածայայտնութեան
տօնին առթիւ, Զմմառու Վանքի Մայր Տաճարին մէջ Ձայնաւոր Ս. Պատարագ մատուցանեց և Ջրօրհնէք
կատարեց Զմմառու Պատրիարքական Միաբանութեան Փոխանորդ և Մեծաւոր վանքիս՝ Հ. Գաբրիէլ Թ.Ծ.Վ.
Մուրատեան: Գերապայծառ Հայրը իր քարոզին մէջ նշեց թէ Աստուածայայտնութեան տօնը Հայ Եկեղեցւոյ
հինգ տաղաւար տօներուն առաջինն է, ուր Քրիստոսի բոլոր տնօրէնութիւնները համախմբուած կը
տօնուին միատեղ, Բ. դարէն սկսեալ: Աստուածայայտնութինը սկիզբն է Փրկչագործութեան և Քրիստոսի
Մկրտութիւնը մարդկային սերունդին վերստին ծնունդն է որպէս Աստուծոյ զաւակներ: Արարողութեան
աւարտին՝ հոգեւորական դասը, դպրաց դասն ու հաւատացեալները հանդիսաւոր թափօրով ուղղուեցան
վանքիս դահլիճը ուր Տնօրհնէք կատարուեցաւ, յաւուր պատշաճի հիւրասիրութիւն տեղի ունեցաւ
և փոխադարձ մաղթանքներ կատարուեցան։