Franca shtrëngon radhët rreth së përjavshmes satirike “Charlie Hebdo”, sulmuar sot
nga një grup terrorist i armatosur me kallashnikov, që me thirrjet “Do të hakmerremi
për profetin”, shkaktoi 12 viktima në selinë e gazetës në Paris. Së paku 30 të shtëna,
që u dëgjuan në bulevardin Richard-Lenoir, vranë dhjetë gazetarë e dy policë. Autorët
e masakrës u larguan me një makinë të vjedhur. Ky është atentati më i përgjakshëm
në Francë, pas vitit 1961, në kohën e luftës në Algjeri. Një bombë në trenin Strasburg-Paris,
pati shkaktuar 28 të vdekur. Në nëntor 2011, pas polemikave për karikaturat e Muhametit,
një bombë pati shpërthyer në selinë e gazetës, duke shkaktuar vetëm dëme materiale.
Kohët e fundit, “Charlie Hebdo” publikoi një karikaturë të kreut të të vetëquajturit
Shtet Islamik, Al Baghdadi. Gjithashtu, në numrin e kësaj jave, gazeta publikon një
artikull kushtuar romanit “Nënshtrimi” të shkrimtarit Michel Houellebecq. Në të, autori
imagjinon një Francë të qeverisur nga një president mysliman, që synon islamizimin
e Evropës dhe hyrjen e Turqisë e të vendeve të ndryshme të Afrikës Veriore në Bashkimin
Evropian. Natyrisht, atentati u dënua nga e gjithë bota, njerëz të thjeshtë, politikanë
e organizata ndërkombëtare. Lapidar, komenti i karikaturistit të njohur italian, Giorgio
Forattini: “Myslimanët [integralistë], ashtu si komunistët, nuk e durojnë satirën”.