Gëzuar Vitin e Ri ! T’ia besojmë Zotit çdo çast të jetës
Çdo vit sjell me vete gëzime e dhimbje, realizime e dështime, perspektiva e
çështje që presin zgjidhje. Po sidoqoftë, ende pa e kapërcyer mirë kufirin ndërmjet
dy viteve, sonte le t’ia lartojmë Zotit lutjen tonë të falënderimit e të mirënjohjes
për të mirat që ka bërë për ne dhe për të gjitha çastet që kemi përjetuar gjatë këtij
viti që po mbaron. Po kështu, t’i lutemi Zotit që të na jap forcën të vijojmë udhën
e jetës në Vitin e Ri, që po agon, të bindur se përmes planeve të mistershme të shtegtimit
tonë tokësor, prej Zotit na vjen ngushëllimi, gëzimi, forca e paqja dhe çdo e mirë
që mund të dëshirojë zemra jonë. Hyji është Atë që pret e don çdo njeri, secili prej
nesh. Në Të e kemi pikënisjen e cakun e jetës. Sonte, ndërsa në ora 24 të mesnatës,
Viti 2014 ia le vendin Viti të Ri 2015 e njerëzit shtrijnë dorën e lartojnë gotat
për t’i uruar njëri-tjetrit një Motmot të Ri të gëzuar e në qiell ndizen yjet e dritat
e fishekzjarrëve, Papa, i lutët Zotit që Viti Ri të jetë Vit i Paqes, i mbrojtjes
së dinjitetit të njeriut e të mjedisit, vit për të ndërtuar një qytetërim të ri mbështetur
mbi mirëkuptimin dhe të vërtetën. Pritja e Vitit t Ri në lutje drejtuar Hyjit
nga Papa, tashmë prej shumë vitesh është bërë një traditë që nga Papa Gjoni XXIII
e deri më sot. Kështu, në orën e kësaj mesnate, Papa do t’i jap lamtumirën një viti
të ngarkuar me shqetësime, frikë, mosmarrëveshje e konflikte dhe situata të vështira
në vise të ndryshme të botës me shpresën në Zotin e nxitjen drejtuar të gjithë njerëzve
vullnet të mirë, të punohet e ndërtohet një rend i ri njerëzor në paqe e respekt të
anasjelltë. Orët e fundit, të jenë orë feste e gëzimi, vëllazërimi e miqësie,
po edhe orë meditimi për të kaluarën e orë shprese për të ardhmen! Ora e fundit
e çdo viti sjell me vete një hir të posaçëm Hyjnor. Ky hir i Zotit kuptohem më mirë
në mbrëmjen e 31 dhjetorit, që na bashkon sot ndër Kisha për të falënderuar Hyjin.
Kjo orë e fundit i dhurohet besimtarëve e çdonjërit prej nesh si një çast faljeje
e hiri. Duke marrë prej Zotit “hire e përmbi hire”, i afrohemi ditë pas dite, vit
pas viti, orës sonë të fundit mbi tokë, që e di vetëm Ati Qiellor. Të mbledhur
sot tok, për të ndjerë veten në bashkim me Jezu Krishtin, në përfundim të këtij viti,
akoma përplot me dritën e Krishtlindjes, drejtojmë vështrimin nga e ardhmja. Që prej
mëse 2000 vjetësh e sodisim Zotin në lavdinë e Tij, “në atë lavdi që i Njëlinduri
e marre prej Atit, plot me hir e me vërtetësi”. Ja, pra, ky është themeli i shpresës
sonë, ja pse besojmë në mënyrë të patundshme se qielli e toka do të mbarojnë, por
s’do të mbarojnë kurrë fjalët e Tij Hyjnore e jetëdhënëse. Të shkojmë, pra, pas Krishtit.
T’i kapërcejmë së bashku me të kufijtë e kalendarit, që ndajnë vitet, e së bashku
të hyjmë në Vitin e Ri, që fillon këtë mesnatë. Në këtë orë solemne, mbarë kombet
e tokës, që kanë parë shpëtimin e Hyjit tonë, bashkojnë zërat në himnin e lavdërimit
e të mirënjohjes. Jemi plot mirënjohje për kohën që Hyji na ka dhuruar, për kohën
e kaluar që perëndon e largohet...shkojmë drejt kohës së re, të ndërgjegjshëm për
forcën që na ka dhuruar Jezu Krishti në Shpirtin Shenjt Zot. Ta lavdërojmë, pra, e
ta falënderojmë Zotin dhe t’i lutemi që të ndriçojë me dritën e Tij të amshuar të
gjitha ditët e Vitit të Ri që po lind. Dëgjues e shqiptarë të nderuar e të dashur,
ju falënderojmë për vëmendjen tuaj, sot e çdo ditë, të këtij viti që po lëmë pas,
e Zoti që kurorëzon këtë Vit me mirësi hyjnore, ju pasuroftë me dhanti e të mira qiellore
gjatë Vitit të Ri. T’i lutemi pra Zotit ta bëjë secilin nga ne, tharm të vërtetë
shprese në mjediset e ndryshme, që të mund të ndërtohet për të gjithë një ardhmëri
më e mirë. E ky është urimi jonë për të gjithë Natën e një Viti të ri, urim që ia
besojmë ndërmjetësisë amtare të Marisë Virgjër, Nënës së Hyjit e Yllit të shpresës!. E
Urimi jonë për Vitin e Ri shndërrohet në lutje drejtuar Zotit, që t’i bëjë të frytshme
përpjekjet e të gjithëve. T’ia besojmë, pra, Atij dëshirat e planet tona njerëzore.
Atij t’ia lartojmë lavdet e lutjen plot besim: Ty, o Atë i jetës, Zanafillën
pa fillesë, E mira e pambaruar e drita e amshuar, Me Birin e me Shpirtin Shenjt, Nderim
e lumturi, lavdi e mirënjohje, Në shekujt pa mbarim. Amen!
Në Ty, o Atë
i jetës shpresuam e në Ty do ta mbështesim përsëri shpresën tonë. Ti, në Krishtlindje
i solle gëzimin botës, duke rrezatuar mbi rrugën e njerëzve e të popujve dritën
tënde, të cilën s’ka forcë që mund ta shuajë.
Urojmë që çdo njeri vullnetmirë
të provojë e shijojë dashurinë dhe paqen tënde Hyjnore, o Atë i ynë Qiellor. Amen!” Gëzuar
Vitin e Ri plot paqe e të mira!