У наступным годзе
папу Францішка чакае насычаны графік касцёльных падзей і мерапрыемстваў. Усе яны грунтуюцца
на цвёрдым перакананні ў тым, што, каб пазбегнуць расколу ў грамадстве і на міжнароднай
арэне, трэба вярнуцца да Бога як да галоўнага арыенціра ў жыцці чалавецтва. 4-25 кастрычніка
ў Ватыкане пройдзе XIV Звычайнай сесія Сіноду Біскупаў на тэму “Пакліканне і місія
сям’і ў Касцёле і ў сучасным свеце”. Яна стане працягам III Надзвычайнай сесіі Сінода,
прысвечанай тэме “душпастысркіх выклікаў, звязаных з сям’ёй у кантэксце евангелізацыі”,
які ставіў мэтай збор інфармацыі пра рэальнае становішча сем’яў на розных кантынентах.
Чакаецца, што наступны Сінод дасць больш поўнае ўяўленне аб касцёльным бачанні пытанняў
сям’і і сужэнства, хаця канчатковае слова і рашэнне па гэтых пытаннях застанецца за
Святым Айцом.
Яшчэ адной важнай падзеяй 2015 г. стане Год кансэкраванага жыцця.
Папа Францішак лічыць яго вельмі важным для ўсяго Касцёла і не толькі: пануючая ў
наш час культура індывідуалізму разбурае грамадства, таму варта прадэманстраваць,
што братэрскае жыццё магчымае.
Сярод знамянальных падзей 2015 г. – апостальскія
падарожжы Пантыфіка, які ў студзені адправіцца ў Азію (у Шры-Ланку і на Філіпіны),
а ў верасні – у ЗША на Сусветную сустрэчу сем’яў, якая пройдзе ў Філадэльфіі. У надыходзячым
годзе папа Францішак наведае таксама Францыю, і, магчыма, некаторыя краіны Афрыкі
і Лацінскай Амерыкі. Святы Айцец здзейсніць і некалькі падарожжаў па Італіі – у Неапаль
(21 сакавіка) з нагоды 200-годдзя з дня нараджэння св. Яна Боска і ў Турын (21 чэрвеня)
з нагоды дэманстрацыі Турынскай плашчаніцы.
Як і сёлета, ў 2015 г. сталая ўвага
Францішка будзе накіравана на Блізкі Усход. Трэба нагадаць, што з нагоды Божага Нараджэння
ён накіраваў пасланне да жыхароў гэтага рэгіену, у якім выказаў сваю салідарнасць
і блізкасць, а таксама пацвердзіў немагчымасць змірыцца з логікай канфлікту і тэрарызму.
Пантыфік перакананы ў неабходнасці міжрэлігійнага дыялогу і больш рашучых намаганняў
з боку міжнароднай супольнасці.
У наступным годзе Францішак працягне звяртаць
увагу на дзейнасць міжнародных арганізацый, асабліва, ААН. Акрамя таго, ён дасць дзесяткі
аўдыенцый кіраўнікам дзяржаў, урадаў, міжнародных і грамадскіх арганізацый, а таксама
прыме каля 30 груп прадстаўнікоў біскупскіх канферэнцый, якія прыбудуць у Апостальскую
сталіцу з візітам “ad limina”.
Чакаецца, што ў 2015 г. будзе апублікаваны шэраг
папскіх дакументаў, у тым ліку і новая энцыкліка, прысвечаная экалогіі.