Katolikët, në Perandorinë otomane në shekullin XVIII-XIX: Kolegja Saveriane e Etërve
Jezuitë
Emisionin e sotëm të ciklit, mbështetur mbi studimin: “Katolikët në Perandorinë
otomane në shekullin XVIII”, fryt i pendës së historianit jezuit atë Gjon (Giovanni)
Sale, botuar në revistën e mirënjohur të jezuitëve italianë “Civiltà Cattolica”, numri
3921, muaji nëntor 2013, ia kushtojmë “Kolegjës Saveriane të Etërve Jezuitë”
Ndërmjet
veprave të misionarëve jezuitë në Shqipëri, në kohët për të cilat flasim, nuk mund
të mos kujtojmë rolin themelor që luajti Kolegja saveriane për zhvillimin e kulturës
në Shqipëri. Kolegja i hapi dyert e veta më 17 tetor 1877. Atë ditë në ndërtesën
e shkollës u mblodhën shumë qytetarë shkodranë, prindër të nxënësve të parë dhe dashamirë
të kulturës. Atë Zef Lombardini u paraqiti institucionin e ri, themelues i të cilit
ishte atë Luigi Mazza. Stema e Kolegjit paraqiste shqiponjën kombëtare. Në anë të
saj shkruhej programi i shkollës: “Për Zot! Për Atme! E përparim!”. Shumë shpejt
kjo shkollë do të bëhej vatër arsimi e kulture jo vetëm për popullsinë katolike, por
edhe për atë islame e ortodokse. Këtë e vërtetojnë statistikat: deri në vitin 1927,
pra gjatë 50 vjetëve, në këtë Kolegjë u shkolluan 2.691 nxënës, prej të cilëve, 2.433
katolikë, 99 ortodoksë e 159 myslimanë. Në fillim shkolla pati profil tregtar (për
vetë natyrën e qytetit, që tregtonte me shumë vise të Ballkanit), pastaj, më 1926,
u kthye në gjimnaz klasik, me programe, plane, tekste e metoda didaktike moderne e
të qëndrueshme. Këtu u krijua për herë të parë në historinë e shkollës shqiptare,
qendra muzeale. Pastaj u ngritën edhe ambjentet e përshtatshme sportive, biblioteka,
ambjentet muzikore, salla e teatrit e observatori. Motua e shkollës ishte: “Punë,
dije, korrektësi!” Kolegja Saveriane, që u mbështet mbi përvojën moderne evropiane
të kohës, formonte nxënës seriozë, të disiplinuar, të aftë për të vazhduar të gjitha
universitetet e Evropës. I kushtonte vëmendje të posaçme mësimit të gjuhëve të huaja,
por pa lënë mbas dore edhe përvetësimin e gjuhës amtare. Një nga nxënësit e saj të
ndritur, Faik Konica do të shkruante: “Me këto e të tjera, kjo shkollë mbahet në një
shkallë të lartë, e gjithë ata që kanë pá shkollat e Francës e të mbarë Evropës, munden
me dishmue se ajo e Shkodrës âsht e zoja për shumë punë, me u vû më një me to”. Në
këtë shkollë dhanë mësim profesorë e mësues të nderuar si Atë Jak Jungu, Atë Anton
Xanoni, Dom Ndre Mjedja, Atë Pjetër Meshkalla, Atë Mark Harapi, Hoxha Musa Effendi
Boriqi (orientalist i njohur, mësues i gjuhës turke), albanologu i madh, Atë Zef Valentini,
profesor Injac Zamputi etj. Mësuesët që dhanë mësim në klasat e kësaj shkolle nuk
ishin mësimdhënës të thjeshtë, por, së pari, dijetarë të njohur. Ata hartuan dhe botuan
edhe tekstet e para shkollore, si “Elementa gramatikore të shqipes” dhe “Fjalori i
vogël italisht” nga Atë Jungu (1881); “Këndime për shkollat e para të Shypnís”(1906);
“Shkurtorja e historís së moçme”; “Dheshkroja e Shqypnís”e “Gramatika e shypes” (1909)
nga atë Anton Xanoni e sa e sa të tjera. Mjafton të themi se gjer më 1928 nga shtypshkronja
jezuite qenë botuar rreth 412 libra, të përgatitur nga vetë mësuesët e Kolegjës. Shumë
është sulmuar nga kalemxhinjtë e komunizmit shkolla e jezuitëve. Është quajtur obskurantiste,
antikombëtare, me horizont të kufizuar për shkak të parimeve fetare nga të cilat udhëhiqej.
Është e pamundur, e panevojshme dhe e pa arsyeshme t’u përgjigjemi sulmeve të penave
të verbuara nga idetë e një diktature që ishte armike e kulturës së lirë e të vërtetë.
Koha do t’ia japë të drejtën atij që e meriton! E ne po mjaftohemi të kujtojmë se
nga bankat e Kolegjës Saveriane dolën disa nga figurat më të shquara të kulturës kombëtare
të të gjitha kohërave, që nga Dom Ndre Mjedja, te Luigj Gurakuqi, te Konica e te Martin
Camaj! E mjaftohemi të theksojmë se kjo shkollë i fali kombit Martirët e fesë Atë
Gjon Faustin, Atë Daniel Dajani e Mark Çunin, të cilët vazhdojnë t’i japin popullit
shqiptar mësimin e besimit në vlerat më të shenjta, që e bëjnë njeriun njeri.