Pizzaballa: Letra e Françeskut, inkurajim për të gjithë
Letra e Papës drejtuar të krishterëve, është thirrje drejtuar bashkësisë ndërkombëtare,
thirrje për ta ndaluar të keqen, pasojë e terrorizmit, si dhe kërkesë drejtuar të
gjithë liderëve fetarë, për të mbajtur qëndrim kundër fundamentalizmit. Letër e bukur,
nxitje për gjithë të krishterët, kometon rojtari i Tokës së Shenjtë, atë Pierbattista
Pizzaballa:
Përgjigje: - Është shkrim, që më preku shumë, sepse
i qartë, shumë i qartë, në mënyrën si e përshkruan situatën që jetojnë të krishterët,
megjithatë, pa pesimizëm, duke i dhënë zemër bashkësisë së krishterë në misionin e
saj, në dëshmimin e fesë me shenjtërinë e jetës, në guximin për ta quajtur të keqen
me emër, domethënë, terrorizëm, që duhet dënuar. E pasur, pastaj, edhe me elemente
të tjera, shumë të rëndësishme, si dialogu ekumenik e ndërfetar. Nuk ka rrugë tjetër,
e thotë qartë Papa. Prej këndej, duhet refuzuar çdo formë anësie, që është dënimi
i kësaj toke. E në sa flasim për dialogun ndërfetar, duhet t’u kërkojmë vëllezërve
tanë myslimanë t’i dënojnë format e zvetënimit të Islamit, përndryshe dialogu nuk
do të kishte në bazë të vërtetën. Kjo është shumë e rëndësishme, siç është e rëndësishme
të mos biem në disfatizëm, në ndeshje ndërmjet qytetërimeve, në kushtrime për të rrokur
armët, sepse këto janë rrugë të verbta, që çojnë në vdekje.
Pyetje: -
Sipas jush, si po e presin të krishterët Letrën e Papës? Përgjigje: - Besoj
se Letra, në vetvete, është gjest shumë i rëndësishëm, që flet për vëmendje. Prej
këndej, shumë e mirëpritur. Përballë dramave të forta, që po jetojmë, ishte i nevojshëm
një orientim, e njëkohësisht thirrje e fortë, thënë nga një zë me autoritet ndërkombëtar.
Pikërisht për këtë kishim nevojë!