Praga përgatitet të presë mijëra të rinjtë nga e gjithë Evropa, që do të “dynden”
në kryeqytetin çek, duke filluar nga 29 dhjetori për të marrë pjesë në Takimin tradicional
të Bashkësisë së Taizé-së për Vitin e Ri. Më të shumtët do të jenë nga Polonia, Ukraina,
Italia, Gjermania, Franca, Kroacia e Bjellorusia, por si çdo vit, do të ketë pjesëmarrës
edhe nga Shqipëria. Tashmë janë bërë mëse 20 vjet që shqiptarët ndjekin jo vetëm këto
takime, por edhe ato në fshatin e vogël në jug të Francës gjatë verës, për një javë
lutjeje e reflektimi së bashku me vëllezërit ekumenikë të Bashkësisë. Mikpritja
në famulli, shkolla, familje Për të dhënë një ide mbi përmasat e Takimit të
Vitit të Ri, disa shifra: do të marrin pjesë mëse 30 mijë vetë, nga 65 vende të ndryshme,
pa llogaritur gati 2 mijë vullnetarët, që do të mbërrijnë në Pragë dy ditë para 29
dhjetorit për të organizuar mikpritjen. Vërtet, pjesëmarrësit do të strehohen në mëse
150 vende të ndryshme, në famulli, kisha e shkolla të rajonit, por sidomos nëpër familje.
17 kisha të qendrës historike të Pragës do të hapin portat për lutjen e së martës
në mesditë dhe gjatë gjithë së mërkurës, 31 dhjetor. Vendet e lutjes në Pragë Në
çdo kishë do të jetë kryqi i Taizé-së, i pikturuar gjatë këtyre javëve nga një grup
artistësh, nën drejtimin e Matej Forman. Një tendë në Parkun e Ekspozitave të Letnany-së
mund të mbajë rreth 4.500 të rinj. Më 1 janar, lutja e orës 19, në katedrale do të
transmetohet drejtpërdrejt nga televizioni çek, së bashku me lutjen e mbrëmjes më
30 dhjetor.