Françesku: i krishteri është i mëshirshëm, rreptësia është shenjë e zemrës së ligshtë
Jezusi na bën të mëshirshëm ndaj njerëzve, ndërsa kush e ka zemrën të ligshtë, sepse
pa themel në Krishtin, rrezikon të jetë i rreptë në disiplinën e jashtme, po hipokrit
e oportunist përmbrenda: këtë theksoi Papa në homelinë e mëngjesit, mbajtur gjatë
kremtimit të Meshës, në Shtëpinë e Shën Martës.
Në qendër
të homelisë, Ungjilli i ditës, në të cilin krerët e priftërinjve e pyesin Jezusin
me çfarë autoriteti i kryen veprat e Tij. Është një pyetje, shpjegoi, që flet vetë
për zemrën hipokrite të këtyre njerëzve: këtyre nuk u interesonte fare e vërteta,
kërkonin vetëm interesat e tyre e shkonin nga frynte era. Shkonin nga u leverdiste:
andej e këndej…Ishin tregtarë flamujsh, eh? Të gjithë! Të gjithë”. Pa qëndrueshmëri.
Kishin zemër të paqëndrueshme. E kështu tregtonin gjithçka: tregtonin lirinë shpirtërore,
tregtonin fenë, tregtonin atdheun, gjithçka, përveç dukjes. Atyre u interesonte vetëm
të hidhnin gurin e të fshihnin dorën. Ishin oportunistë: përfitonin nga situata. E
pra, ndokush mund të më thotë: “Por, o Atë, këta njerëz ishin ndjekës të ligjit: të
shtunën nuk ecnin më shumë se njëqind metra, a kush e di sa duheshin bërë. Nuk shkonin
kurrë, kurrë në sofër, pa larë duart e pa marrë avdes. Ishin njerëz shumë, shumë
të saktë në respektimin e dokeve e të zakoneve. Po, është e vërtetë, por këtë e bënin
vetëm për t’u dukur. Ishin të fortë për sy e faqe. Ishin të ngrirë në allçi. Zemra
e tyre ishte tejet e ligshtë, e as ata vetë nuk e dinin në çka besonin. Prandaj jeta
e tyre, në anën e jashtme, ishte krejt e rregullt, por zemra u luhatej sa andej, këndej:
zemër e ligshtë, lëkurë allçie, e fortë, e ngrirë. Jezusi, përkundrazi, na mëson se
i krishteri duhet ta ketë zemrën të fortë, të qëndrueshme, zemër që rreh mbi shkëmb,
mbi Krishtin, e pastaj të ecin me urti: “Në këtë rast bëj këtë, në atë rast, atë…”.
Është mënyra si ecin përpara, por pa e nxjerrë zemrën në treg, sepse nuk mund të tregtohet
zemra, nuk mund të nxirret në treg shkëmbi. Shkëmbi është Krishti e nuk mund të tregtohet!”. Kjo
është drama e hipokrizisë së këtyre njerëzve. E Jezusi nuk e tregtonte kurrë zemrën
e Tij prej Biri, që i përkiste Atit, por ishte i çiltër me njerëzit, kërkonte rrugët
për t’i ndihmuar. “Por kjo nuk mund të bëhet; disiplina jonë, doktrina jonë thotë
se nuk mund të bëhet”, thoshin . “Pse dishepujt e tu hanë grurë në arë, kur ecin,
ditën e shtunë? Nuk mund të bëhet kjo!”. Ishin tepër të ngurtë në disiplinat e tyre:
“Jo, disiplina nuk preket, është e shenjtë”. Françesku kujtoi, më pas, Piun XII,
që i liroi të krishterët nga kryqi i rëndë i agjërimit eukaristik. Disa nga ju
ndoshta e kujtojnë, vijoi Papa. Nuk duhej pirë asnjë pikë ujë. Asnjë pikë. E për të
larë dhëmbët, duhej pasur kujdes të mos e gëlltisje ujin. Unë vetë, kur isha fëmijë,
shkova e u rrëfeva, nga që besoja se para Kungimit kisha gëlltitur një pikë uji. E
vërtetë kjo, apo jo? E vërtetë. Kur Piu XII e ndryshoi disiplinën, farizenjtë bërtitën:
“Herezi! Nuk preket disiplina e Kishës!”. E u shkandulluan. Sepse Piu XII kishte bërë
si Jezusi. Kishte parë nevojat e njerëzve. Po këta njerëz të varfër, me gjithë këtë
vapë!”. E pastaj, meshtarët, që kremtonin tri meshë, të fundmen në orën një, pas mesdite,
agjërueshëm. Për të respektuar disiplinën e Kishës. E këta farizenj ishin kështu.
Mbronin disiplinën. E kishin lëkurën e fortë, apo, si thoshte Jezusi, i kishin zemrat
të prishura, të ligshta, të ligshta, deri në kalbësirë. Të errët në zemër. Kjo
është drama e këtyre njerëzve. E Jezusi denoncon pikërisht hipokrizinë, oportunizmin
e tyre. “Edhe jeta jonë mund të bëhet kështu, edhe jeta jonë. E nganjëherë, ju rrëfej
një gjë, kur kam parë ndonjë të krishterë kështu, me zemër të ligshtë, pa qëndresë,
pa forcë mbi shkëmbin Jezus e krejt të ashpër përjashta, i kam kërkuar Zotit: “Po,
o Zot, hidhja një lëkurë bananeje përpara, që të rrëshqasë e të rokulliset e të turpërohet
se është mëkatar e kështu të të takojë Ty, që je Shpëtimtari’. Eh, nganjëherë mëkati
të bën të turpërohesh shumë e të takohesh me Hyjin, që të fal, si ata të sëmurët,
që shkonin te Zoti për t’u shëruar. Por njerëzit e thjeshtë, vërejti Papa, nuk
gabonin, pavarësisht nga fjalët e doktorëve të ligjit, nga që njerëzit e dinin, e
kishin nuhatjen e fesë. Papa e përfundoi homelinë me një lutje: “I kërkoj Zotit
hirin që zemra jonë të jetë e thjeshtë, e ndritshme, për të parë të vërtetën, që Ai
na e jep, e kështu të mund të jemi të ëmbël, të falim, t’i kuptojmë të tjerët, ta
kemi zemrën të gjerë, plot me mëshirë. Të mos dënojmë kurrë! Kurrë! Nëse të merr malli
të dënosh, dëno vetveten, se një farë arsyeje e ke gjithnjë, eh? T’i lutemi Zotit
të na e japë këtë dritë shpirtërore, që na bind se vetëm Ai është shkëmbi, e jo storet,
që shpesh nuk kanë pikë rëndësie. Është Ai, që na tregon udhën. Ai që na shoqëron
në udhë. Ai, që na zgjeron zemrën, për të hyrë aty problemet e njerëzve e Ai, që na
e jep hirin, të cilin ata njerëz nuk e kishin: ta ndjejmë veten mëkatarë.