Папа: ад Лацінскай Амерыкі чакаюць новых мадэляў развіцця
“Magnificat” Марыі
заклікае прасіць, каб будучыню Лацінскай Амерыкі кавалі ўбогія, пакутуючыя, пакорныя,
галодныя і прагнучыя справядлівасці, чыстыя сэрцам, міратворцы, гнаныя за імя Хрыста,
сказаў папа Францішак 12 снежня 2014 г. падчас гаміліі на св. Імшы ў базыліцы св.
Пятра ў Ватыкане ва ўспамін Маці Божай Гвадэлупскай. Пантыфік адзначыў, што культ
апякункі Амерыкі распасціраецца “ад Аляскі да Патагоніі”. Ён нагадаў, што Маці Божая
з’явілася беднаму індзейцу Хуану Дыега ў XVI стагоддзі. “Праз яе хрысціянская вера
стала найвялікшым духоўным скарбам народаў Лацінскай Амерыкі, самай каштоўнай жамчужынай
якога з’яўляецца Езус Хрыстус”, - сказаў Святы Айцец. Марыя ўзвышае пакорных, абараняе
бедных і прыніжаных, даючы благаслаўленне і надзею тым, хто верыць у яе міласэрнасць,
і, разам з тым, скідвае з трона багатых, магутных і ўладных, працягнуў свае разважанні
Папа. Ён адзначыў, што гімн “Magnificat” уводзіць нас у “благаслаўленні”, якія з’яўляюцца
асноўным сінтэзам і законам евангельскага паслання.
Францішак нагадаў, што
Лацінскую Амерыку называюць “кантынэнтам надзеі”, бо ўсе чакаюць ад яе новых мадэляў
развіцця, якія спалучаюць хрысціянскую традыцыю з грамадзянскім прагрэсам, справядлівасць
і роўнасць з паяднаннем, навукова-тэхнічнае развіццё з чалавечай мудрасцю, урадлівае
цярпенне з радасцю, напоўненай надзеяй. Гэту надзею можа абараніць толькі праз вялікія
дары праўды і любові, якія з’яўляюцца асновай усёй рэальнасці, рэвалюцыйнымі рухавікамі
сапраўднага новага жыцця, сказаў Святы Айцец.
Эўхарыстыя ў інтэнцыі Лацінскай
Амерыкі сабрала кардыналаў, духавенства і свецкіх вернікаў з Мексікі, Бразіліі, Чылі,
ЗША, Канады і іншых краін. На ёй выконвалася знакамітая “Misa Creola” (Крэольскай
імша), напісаная роўна 50 гадоў таму аргентынскім кампазітарам Арыэлем Рамірасам.