Святы Айцец заклікаў хрысціян Блізкага Усходу да мужнай веры
Папа Францішак выказаў
сваю блізкасць і падтрымку хрысціянам Блізкага Усходу, прымаючы 12 снежня 2014 г.
на аўдыенцыі біскупаў, святароў і вернікаў Сіра-каталіцкай Царквы. Яны прыбылі ў Рым
разам з Патрыярхам Антыёхіі Ігнацыем ІІІ Юнанам для правядзення Сінода на тэму літургічнай
рэформы. Пантыфік нагадаў, што цяжкая сітуацыя на Блізкім Усходзе прымушае вернікаў
пакідаць рэгіён. Гэта, у сваю чаргу, прыводзіць да новых душпастырскіх патрэб і кідае
падвоены выклік: захавання вернасці паходжанню і інтэграцыі ў новы культурны кантэкст.
Імкненне вернікаў Блізкага Усходу ў напрамку больш “бяспечных” месцаў, памяньшае прысутнасць
хрысціян на “зямлі прарокаў, першых прапаведнікаў Евангелля, мучанікаў і шматлікіх
святых, у калысцы пустыннікаў і манаства”, заўважыў Папа. У сувязі з гэтым, ён заклікаў
удзельнікаў Сінода Сіра-каталіцкай Царквы паразважаць аб сітуацыі сваіх епархій, “якія
патрабуюць дбайных пастыраў і адважных вернікаў, здольных сведчыць аб Евангеллі ў
часам няпростых адносінах з асобамі іншых народнасцяў і рэлігій”, сказаў Папа.
Францішак
заклікаў сіра-каталіцкую супольнасць, разам з прадстаўнікамі іншых Цэркваў, адказваць
на гуманітарныя патрэбы людзей, якія застаюцца ў зонах канфліктаў або вымушаны пакідаць
радзіму.
Сіра-каталіцкая Царква налічвае каля 266 тыс. вернікаў, якія пражываюць
галоўным чынам ў Іраку, Сірыі, Ліване, Іарданіі, ЗША. Сядзіба яе кіраўніка, Патрыярха
Антыёхіі і ўсяго Усходу, знаходзіцца ў ліванскім Бейруце.