“Lineamenta” e Sinodit për Familjen 2015: të mos fillojmë nga zero
Kisha është vënë për udhë drejt Asamblesë XIV të Përgjithshme të Sinodit të Ipeshkvijve
me temë “Thirrja dhe misioni i familjes në Kishë dhe në botën bashkohore”. Ipeshkvijtë
do të mblidhen nga 4 deri më 25 tetor 2015, por “Lineamenta”-t e këtij takimi të rëndësishëm
u publikuan dje. Kësaj radhe ato nuk janë argumente të përcaktuara më parë, por një
sërë pyetjesh mbi dokumentin përfundimtar të Sinodit të jashtëzakonshëm, që u mbajt
në tetor të këtij viti, bashkangjitur me vetë dokumentin, apo “Relatio Synodi”. Përgjigjet
e ipeshkvijve duhet t’i paraqiten Sekretarisë së Përgjithshme të Sinodit brenda 15
prillit 2015, për t’i dhënë asaj mundësinë të përgatisë “Instrumentum Laboris”, pra
listën e argumenteve mbi të cilat do të diskutohet në Sinod. Është e rëndësishme,
shkruhet në dokument, “të udhëhiqemi nga ndryshimet në baritori, që filluan të përvijohen
në Sinodin e jashtëzakonshëm” e të bëhet ç’është e mundur për të mos filluar nga e
para, por nga ajo pikë, ku e la çështjen ky Sinod. Sekretaria e Përgjithshme, e kryesuar
nga kardinali Lorenzo Baldisseri, u kërkon organizmave të ndryshme kishtare të përshkruajnë
hollësisht gjendjen e familjes në shoqërinë ku jetojnë dhe aspektet, që duhen vënë
në dukje. Ndërsa Popullit të Zotit i kërkohet të reflektojë mbi mënyrën më të drejtë
për t’iu përgjigjur sfidave të shekullarizimit, për t’i përkrahur familjet në përballimin
e kontradiktave kulturore, që karakterizojnë botën e sotme. Si t’i përfshijmë – pyetet
në dokument – bashkësitë kishtare në formimin e meshtarëve të ngarkuar me punën baritore
me familjet e si t’i mbështesim familjet në misionin e tyre ungjillëzues, si “Kisha
shtëpiake”? E më pas: si t’i ndihmojmë familjet e brishta, problematike; si të promovojmë
më mirë vlerat e dëshmuara nga familjet e krishtera , gëzimin e tyre? Pyetjet
e dokumentit prekin të gjitha fushat e jetës kishtare e përvijojnë një bashkëpunim
gjithnjë e më të madh të klerit me laikët. Siç doli edhe nga Sinodi i jashtëzakonshëm,
çështjet më të vështira e më të ndërlikuara janë, pa dyshim, ato, që kanë të bëjnë
me të divorcuarit e rimartuar dhe me familjet, të cilat kanë në gjirin e tyre njerëz
me prirje homoseksuale. Koncili II i Vatikanit dhe Ungjilli i Familjes janë busullat
për t’u orientuar në kuptimin e vlerave të martesës së pazgjidhshme e fekonde, në
vlerësimin e problemeve të moslindjes së fëmijëve, në formimin e vetëdijes për transmetimin
dhe mbrojtjen e jetës. “Lineamenta”-t vënë theksin edhe në pyetjet mbi përmirësimin
e përgatitjes së çiftit të ardhshëm, mbi mënyrën e afrimit të atyre, që i qëndrojnë
larg Kishës pas marrjes së Sakramenteve të para e, edhe të atyre, që nuk janë të pagëzuar,
mbi përfshirjen e bashkëpunimin me institucionet shoqëroro-politike në nivelin lokal
dhe ndërkombëtar. Me rastin e festës së Familjes Shenjte, që kremtohet më 28 dhjetor,
Sekretaria e Përgjithshme e Sinodit të Ipeshkvijve i fton të gjitha bashkësitë kishtare
të luten e të kremtojnë meshë për familjen dhe për asamblenë e ardhshme sinodale,
duke përdorur për këtë qëllim lutjen e shkruar nga Papa Françesku enkas për Sinodin
e Familjes.