Ядзернае стрымліванне
і пагроза ўзаемнага знішчэння не могуць быць падставай этыкі братэрства і мірнага
суіснавання народаў і нацый, напісаў Святы Айцец у звароце да ўдзельнікаў Канферэнцыі
па гуманітарных наступствах прымянення ядзернай зброі, якая пачалася 8 снежня 2014
г. у Вене. У ёй удзельнічаюць 800 дэлегатаў з больш чым 150 краін. “Я перакананы,
што імкненне да міру, якое глыбока ўкаранілася ў чалавечым сэрцы, прыносіць плён у
канкрэтных спосабах гарантавання, што ядзерная зброя будзе забаронена назаўжды на
карысць нашага агульнага дома”, - адзначыў Папа. Ён лічыць, што “свет без ядзернай
зброі магчымы”.
Святы Пасад заўсёды выступаў супраць выкарыстання, валодання
і распрацоўкі ядзернай зброі, аб чым сведчыць, напрыклад, энцыкліка св. Яна XXIII
“Pacem in terris”. Тым не менш, падчас халоднай вайны ў 80-х гадах ХХ ст. прымаў выкарыстанне
ядзернага стрымлівання у якасці ўмовы, каб пазбегнуць горшых наступстваў, але не як
каштоўнасць саму па сабе. Распаўсюджанасць гэтага віду зброі ў шматпалярным свеце,
разам з пагрозай крадзяжу ядзерных матэрыялаў тэрарыстамі, зрабіла яго больш небяспечным,
чым калі-небудзь. І таму Апостальская Сталіца вярнулася да прынцыпу, што ўладанне
ядзернай зброяй з’яўляецца цалкам непрымальным.
У цяперашні час у свеце – каля
17 тыс. атамных бомб, што азначае 85-працэнтнае зніжэнне іх колькасці ў параўнанні
з перыядам заканчэння халоднай вайны, калі іх колькасць складала 70 тыс. Аднак, як
папярэджваюць эксперты, гэта скарачэнне стварыла “ілжывае пачуццё бяспекі” сярод людзей,
якія прымаюць ядзерную пагрозу як нешта абстрактнае.