Кіраўнік беларускіх грэка-католікаў пра біскупа Сіповіча і кананізацыю Скарыны
У Рыме завяршыліся
ўрачыстасці, прысвечаныя 100-годдзю з дня нараджэння біскупа Чэслава Сіповіча. Яны
праходзілі ў царкве пры Папскім калегіўме “Russicum” і ў генеральным доме айцоў Марыянаў.
Спецыяльна для ўдзелу ў іх у Вечны горад з Беларусі прыбылі Біскуп Віцебскі Алег Буткевіч
і Апостальскі візітатар для Грэка-католікаў Беларусі айцец архімандрыт Сяргей Гаек.
Мы сустрэліся з кіраўніком беларускіх грэка-католікаў у студыі Ватыканскага радыё
і паразмаўлялі пра постаць біскупа Сіповіча і перспектывы адраджэння Касцёла ў Беларусі.
Ойча
Сяргей, распавядзіце калі ласка пра святкаванне 100-годдзя з дня нараджэння біскупа
Чэслава Сіповіча. Чаму гэтыя ўрачыстасці маюць такое вялікае значэнне для сённяшніх
беларускіх католікаў?
Хачу нагадаць, што ўвесь гэты год прайшоў пад знакам
юбілею 100-годдзя іерарха. У жніўні адбыліся ўрачыстасці на яго радзіме – у Друі.
На іх прысутнічалі: Апостальскі нунцый у Беларусі, арцыбіскуп Клаўдыё Гуджэроцці,
Біскуп Віцебскі Алег Буткевіч і грэка-каталіцкі іерарх са Славакіі, епіскап Мілан.
Уладыку Сіповіча таксама ўспаміналі ў Празе, Антверпене і Лондане. І зараз у дзень
яго нараджэння – 8 снежня, – было святкаванне ў Рыме. На самой справе – гэта былі
два дні. У нядзелю 7 снежня прайшла святочная літургія ў царкве пры Папскім калегіўме
“Russicum”, якую узначаліў арцыбіскуп Кірыл Васіль, сакратар Кангрэгацыі па справах
Усходніх Касцёлаў. На яе сабралася беларская супольнасць Рыма. 8 снежня прайшлі ўрачыстыя
Нешпары ў генеральным доме айцоў марыянаў, якія ўзначаліў Біскуп Віцебскі Алег Буткевіч.
Гэтыя два дні дапамаглі нам нанова сустрэцца з постаццю і спадчынай біскупа Чэслава.
Лейтматывам
гэтых урачыстасцяў была адна назва – Друя. З гэтым месцам звязана гісторыя
жыцця біскупа Сіповіча. Зараз гэта невялікае мястэчка, не самае важнае з геапалітычнага
і рэлігійнага пунктаў гледжання. Але гэта назва гучыць сёння. Чым важная Друя для
Каталіцкага Касцёла ў Беларусі.
Адтуль вырастаюць карані беларускай традыцыі
мясцовага Касцёла. Каталіцкі касцёл і Грэка-каталіцкая Царква не нарадзіліся ўчора.
Яны маюць сваю багатую традыцыю. Асабліва ў 20-я гады ХХ ст., калі ў Друі быў адноўлены
кляштар марыянаў, прычым беларускіх марыянаў, там пачалася праца не толькі над малітвай
па-беларуску, але і над беларускай культурай. З Друяй былі звязаны вялікія постаці:
і архімандрыта Фабіяна Абрантовіча, і архімандрыта Андрэя Цікоты, і іераманаха Язэпа
Германовіча. Іх справа тады пачала ўзрастаць і пашырацца па ўсёй Беларусі. Нават сёння
мы сустракаем людзей, якія некалі ў міжваенны час спаткаліся з кімсьці з друйскіх
марыянаў, і не толькі марыянаў, бо туды прыяжджалі іншыя беларускія святары.
Вялікая
спадчына! Мы гэту спадчыну не асэнсавалі да канца, магчыма нават па нейкіх геапалітычных
прычынах. Але яе спасціганне з’яўляецца нашым абавязкам. І дзякуй Богу, Біскуп Віцебскі
бачыць каштоўнасць гэтага. А зараз, пасля таго як марыяне, на жаль, адышлі з Друі,
новы пробашч, кс. Сяргей Сурыновіч, пачаў вельмі салідную працу па тым, што можна
назваць дыялогам веры і культуры.
Ойча Сяргей, ячшэ адна вельмі знакавая,
фундаментальная постаць для беларускай культуры, імя якой апошнім часам прагучала
ў кантэксце Грэка-каталіцкай Царквы ў Беларусі – гэта Францішак Скарына,
наш першадрукар. З’явілася інфармацыя аб грамадскай ініцыятыве, якая
мае на мэце распачаць працэс кананізацыі гэтай асобы. І прадстаўнікі гэтай грамадскай
ініцыятывы звярнуліся да Грэка-каталіцкай Царквы ў Беларусі, каб яна нейкім чынам
паспрыяла гэтаму. Наколькі гэта ўсё магчыма?
Мы ўсе чакаем 500-годдзя
юбілею выдання Францішкам Скарынай першай беларускай Бібліі. У нашай Царкве ўжо 10
гадоў таму пачалося абмеркаванне гэтай тэматыкі. Прычым гэта адбывалася не толькі
ў грэка-католікаў. Ёсць пэўныя колы, якія пачынаюць нанова асэнсоўваць каштоўнасці
справы Скарыны. Менш, на жаль, вывучана біяграфія першадрукара. Ёсць шмат невядомых
момантаў, не да канца вывучаных. І таму, калі нарадзіўся гэты грамадскі камітэт, а
там ёсць сур’ёзныя гісторыкі, у нас паўстала спадзяванне на іх вельмі салідную працу,
заснаваную на крыніцах. Яны ведаюць пра нашу духоўную сімпатыю да асобы Францішка
Скарыны і свядомасць каштоўнасці гэтай асобы для ўсёй Беларусі. Таму камітэт і заявіў
пра свае спадзяванні адносна падтрымкі з боку Грэка-каталіцкай Царквы.
Мы
са свайго боку чакаем на іх салідную працу над біяграфіяй і вывучэннем некаторых момантаў,
таму што гэты чалавек патрабуе таго, каб сцвердзілі, што ён быў глыбокаверуючым. І
гэта ў дадзеным кантэксце самае важнае. Пытанне кананізацыі – гэта зусім іншая гіаторыя.
І тут грамадскі камітэт не да канца кампетэнтны, хоць можа маліцца ў інтэнцыі кананізацыі.
Але гэта справа Царквы і кананічнага працэсу, прычым вельмі складанага, і сёння занадта
рана казаць, наколькі жыццё і справы Скарыны дазваляюць наогул распачаць гэты кананічны
працэс. Таму мы зараз знаходзімся на этапе асэнсавання яго біяграфіі, і тут ёсць пэўныя
пытанні, на якія мы пакуль што не ведаем як адказаць.