Koha e Ardhjes, kohë e pritjes, e përtëritjes. Meditime për çdo ditë: 9 dhjetor
Edhe ligështia është mundësi
Ndërsa ec, zbuloj se jam vetë ligështia.
Po kjo nuk më shtyn të dredhoj rrugë. Ligështia mund të shndërrohet në dëshirë
për të luftuar e për të ndryshuar, për të kërkuar e për të gjetur. Tani e kuptoj
se pikat e ligshta, ato që i quajmë plagë, mungesat, tronditjet, kur i mendon thellë,
shndërrohen në shtytje për t’i mjekuar, për t’i rishikuar, bëhen thirrje për ndihmë,
për lutje e, së fundi, shkollë, ku merret dija e ngjarje, që rrezatojnë dritë. Por,
të shfletojmë një çast Ungjillin. A nuk ishin pikërisht verbëria e një varfanjaku
të zhgërryer përdhe, gjymtimi i një çalamani, përdredhimi i një gruaje, që gjykohet
si mëkatare publike; e edhe ethet e vjehrrës së Pjetrit, e deri vdekja e të birit
të vejushës së Nainit, raste për t’u takuar me Zotin? Pa hirin e mëshirën e Hyjit,
mjerimet personale, tonat e ato të shoqërisë, e ndalin rrjedhën e veprimit e bëhen
amulli, mjerim, shtypje, varfëri. Atëherë dinjiteti shkelet nën gjithfarë këmbësh.
E njeriu mbyllet brenda një rrethi terri. I shtrydhur nga dora e huaj. Jetim, mes
njerëzve. Nga ana tjetër, të jetuarit me frikë ose mosnjohja e ligështive dhe
e plagëve, mund të na i verbojë të dy sytë aq, sa të mendojmë se jemi të përkryer,
se s’ka si ne. Atëherë nisim t’i shikojmë të tjerët e botën nga maja e malit të vetvetes
e na duken bubrreca, që enden nëpër jetë fare kot. Në kërkim të thërrimeve. Ndërsa
vetëdija e papërkryerjes sonë, na vë shpesh para së papriturës: ajo që duket e kotë,
që nuk meriton të tregohet, që duhet flakur - me e për hir të Hyjit - shndërrohet
në një fillesë të re, plot me dritë. Ngrihesh përsëri në këmbë, me shikimin e ngulur
përpara, vëren rrethin e ëndrrave e gjen fillin e humbur në dritën e agut, që shkrep
në horizontin e së sotmes sate. Shërimi nis sot, në çastin kur ti e pranon se je
plot me plagë, me cene, njëherësh me britmën drejtuar atij, që i bën të reja të gjitha
sendet. “Vëllezër, të keni të njëjtat ndjenja, të cilat ishin në Jezu Krishtin.
Jezu Krishti, megjithëse me natyrë hyjnore nuk e mbajti porsi
visar të fshehur njësimin e vet me Hyjin, por e zhveshi vetveten e mori
gjendjen e shërbëtorit duke u bërë i ngjashëm me njerëz; i paraqitur
në formën njerëzore, e përuli veten, duke iu shtruar dëgjesës deri në vdekje, e
në vdekjen e kryqit. Për këtë arsye Hyji e lartoi e i dha një
emër, i cili është mbi çdo emër tjetër: që në emër të Jezu Krishtit
të përkulet çdo gju, në qiell, mbi tokë e nën tokë; e çdo gjuhë
të shpallë se Jezu Krishti është Zoti, për lumní të Hyjit, Atë”.
Prej
Letrës të Shën Palit apostull drejtuar Filipianëve (Fil 2, 5-11)