Papa në Sheshin e Spanjës, për të nderuar Zojën e Papërlyer
Sot pasdite, sipas traditës, Papa Françesku shkoi në Sheshin e Spanjës, në zemër të
Romës, për të vendosur lule e për t'u lutur në këmbët e shtatores së Virgjërës, ngritur
që më 1857, vendosur mbi një shtyllë 30 metra të lartë, që na kujton dogmën e së Papërlyerës,
shpallur nga Piu IX, më 1854. Shtegtimi tradicional
i romakëve në Sheshin e Spanjës, filloi që herët në mëngjes. Në orën 7.30 një zjarrfikës
i dhuroi Virgjërës Mari kurorën e parë me lule të bardha të festës. Sipas traditës,
qenë pikërisht zjarrfikësit e Shtetit Papnor ata që e vendosën shtatoren e Nënës së
Papërlyer të Krishtit mbi shtyllën, e cila stolis një nga sheshet më në zë të Qytetit
të Amshuar. Lulet e para të bardha te këmbët e kësaj shtatoreje i vuri Papa Piu
XII më 1957. Ndërsa sot, te këmbët e Shtatores së Zojës të Zënë pa Mëkat, u gjunjëzua
për herë të dytë, Papa Françesku. Gjest feje e devocioni, të cilin bashkësia e krishterë
e përsërit nga viti në vit, gati si të donte t’i ripohonte besnikërinë Asaj, që i
siguron ndihmën dhe mbrojtjen amtare në të gjitha rrethanat e jetës së përditshme.
Papa u nis nga Shtëpia e Shën Martës në orën 15.45, për t’u gjunjëzuar para Zojës
Salus Populi Romani, në Bazilikën e Shën Marisë së Madhe. Rreth orës 16.15 ishte
në në Sheshin e Spanjës, ku i drejtoi Zojës së Papërlyer lutjen: “O Mari, Nëna
jonë, sot populli i Hyjit në festë, të nderon, o e Papërlyer, e ruajtur përherë
nga molepsja e mëkatit. Pranoje nderimin që po të bëj, në emër të Kishës në
Romë e në botën mbarë. Vetëdija se ti, Nëna jonë, je krejt e lirë nga mëkati, na
mbush me ngushëllim. Vetëdija se e keqja mbi Ty s’ ka pushtet, na mbush me shpresë
e fuqi në luftën e përditshme që duhet ta luftojmë kundër kërcënimeve të të
Keqit. Por në këtë luftë nuk jemi vetëm, nuk jemi jetimë: sepse Jezusi, para
se të vdiste mbi Kryq, na dhuroi Ty, që të kishim pranë si Nënë. Ne pra, dhe
pse mëkatarë, jemi bijtë e tu, bijtë e së Zënës pa Mëkat, të thirrur për shenjtërinë,
që në Ty shkëlqen për hir të Hyjit, që në zanafillë të jetës. Frymëzuar nga
kjo shpresë kërkojmë sot mbrojtjen tënde amtare për ne, për familjet, për
këtë Qytet, për botën mbarë. Pushteti i dashurisë së Hyjit, që ty të mbrojti
nga mëkati i rrjedhshëm, me ndërmjetësinë tënde, njerëzimin e çliroftë nga
çdo skllavëri shpirtërore e materiale dhe bëftë të ngadhënjejë në zemrat e në
ngjarjet, plani i shëlbimit të Zotit. Premto që edhe në ne, bijtë e tu, hiri
të fitojë mbi kreninë e të bëhemi të mëshirshëm si i mëshirshëm është Ati ynë
qiellor. Në këtë kohë, që na çon kah Festa e Lindjes së Jezusit, na mëso
të shkojmë kundër rrymës, të zhvishemi, të përulemi, të dhurohemi, të dëgjojmë,
të heshtim e të zbrazemi nga vetvetja, për t’i hapur vend bukurisë së Hyjit,
gurrë e gëzimit të vërtetë. O Nëna jonë e Papërlyer, lutu për ne!”. Gjatë
kremtimit, Papa vendosi lulet e bardha pranë shtyllës, dhuratë për Zojën e Papërlyer.
Vijuan pastaj, leximet, lutjet, litanitë e Zojës dhe bekimi apostolik.