Կիրակի օրուայ Աւետարանական ընթերցում Ղուկ. 12, 12-24

12 որովհետեւ Սուրբ Հոգին պիտի սորվեցնէ ձեզի նոյն ժամուն` ի՛նչ որ պէտք է խօսիլ»:
13 Բազմութեան մէջէն մէկը ըսաւ անոր. «Վարդապե՛տ, ըսէ՛ եղբօրս` որ ինծի հետ բաժնէ [մեզի ինկած] ժառանգութիւնը»:
14 Ան ալ ըսաւ անոր. «Մա՛րդ, ո՞վ նշանակեց զիս իրաւարար կամ բաժնող` ձեր վրայ»:
15 Ապա ըսաւ անոնց. «Ուշադի՛ր եղէք եւ զգուշացէ՛ք ագահութենէ. որովհետեւ մէկուն ստացուածքներուն առատութենէն [կախուած] չէ իր կեանքը»:
16 Առակ մըն ալ խօսեցաւ անոնց` ըսելով. «Հարուստ մարդու մը արտերը տուին առատ բերքեր,
17 եւ ան կը մտածէր ինքնիրեն` ըսելով. “Ի՞նչ ընեմ, որովհետեւ տեղ չունիմ` ուր բերքերս ժողվեմ”: Եւ ըսաւ.
18 “Սա՛ պիտի ընեմ. պիտի քանդեմ ամբարներս, պիտի կառուցանեմ աւելի՛ մեծերը, հոն պիտի ժողվեմ իմ բոլոր բերքերս ու բարիքներս,
19 եւ պիտի ըսեմ անձիս. «[Ո՛վ իմ] անձս, շատ բարիքներ ունիս` *դիզուած շատ տարիներու համար. հանգչէ՛, կե՛ր, խմէ՛ [եւ] զուարճացի՛ր»”:
20 Բայց Աստուած ըսաւ անոր. “Անմի՛տ, այս գիշեր անձդ պիտի պահանջուի քեզմէ. ուստի որո՞ւ պիտի ըլլան այդ պատրաստած բաներդ”:
21 Այսպէս է ան` որ գանձ կը դիզէ ինքնիրեն համար, բայց չի հարստանար Աստուծոյ մօտ»:
22 Եւ ըսաւ իր աշակերտներուն. «Ուստի կը յայտարարեմ ձեզի. “Մի՛ մտահոգուիք ձեր անձին համար` թէ ի՛նչ պիտի ուտէք, ո՛չ ալ մարմինին համար` թէ ի՛նչ պիտի հագնիք.
23 [որովհետեւ] անձը կերակուրէն աւելի է, ու մարմինը` հագուստէն:
24 Դիտեցէ՛ք ագռաւները, որոնք ո՛չ կը սերմանեն եւ ո՛չ կը հնձեն, որոնք ո՛չ շտեմարաններ ունին, ո՛չ ալ ամբարներ, բայց Աստուած կը կերակրէ զանոնք. դուք ո՜րչափ աւելի կ'արժէք թռչուններէն: