Françesku: zhvillimi ekonomik është bazë për realizimin e të drejtave të familjes
Familja ka një pozicion të pazëvendësueshëm e themelor, si në shoqërinë civile, ashtu
edhe në atë kishtare, shkruan Papa në një Mesazh, drejtuar Festivalit të Familjes,
që u mbajt sot në Riva del Garda, provinca e Trentos, me temë: “Ekosistemi, jeta e
puna, punësimi femëror, lindja e fëmijëve, mirëqenia dhe zhvillimi ekonomik”. Sot
nuk mjafton më të pohosh sa rëndësi ka familja - thekson Papa në mesazh - duhet një
strategji jashtëzakonisht e guximshme në favor të saj, për t’i ridhënë hov të ri
zhvillimit ekonomik të vendit, duke parë edhe problemet e zhvillimit të sotëm demografik.
Për Papën, ka ardhur koha të vihen konkretisht në jetë të drejtat e familjes,
sepse është vetë ardhmëria e shoqërisë, që varet nga instituti familjar, i cili ka
nevojë për mbështetje e garanci. Pikërisht për arsye të angazhimit e të përgjegjësisë,
që kërkon nxjerrja në dritë e fëmijëve dhe edukimi i tyre, familjet kanë nevojë për
ndihmë nga ana e agjencive publike si dhe nga ndërmarrjet. Koha kërkon përkim ndërmjet
angazhimit publik e privat, ndërmjet sipërmarrjeve e familjeve. Duhet rishikuar,
e me shumë vëmendje, drama e papunësisë, e sidomos në radhët e të rinjve. Papa mendon
për hartimin e politikave familjare, duke kujtuar statutin juridik e shoqëror të familjeve
në përgjithësi, e, sidomos, ndihmën që u duhet dhënë familjeve më nevojtare në planin
material e moral. Françesku kërkon të vihet në qendër të vëmendjes edhe punësimi
i grave. Shumë gra ndjejnë nevojën t’u njihen më mirë të drejtat e tyre, duke vlerësuar
detyrat që kryejnë në sektorë të ndryshëm të jetës shoqërore e profesionale, në gjirin
e familjes e të shoqërisë. Disa prej tyre janë tejet të lodhura e gati-gati të shtypura
nën barrën e angazhimeve e të detyrave, nësa pak gjejnë mirëkuptim e ndihmë. Duhet
menduar, ua qan hallin Papa grave, që gruaja të mos ngarkohet me punë tepër të rënda,
e shtyrë nga nevoja për të përballuar kërkesat ekonomike të jetës familjare. E të
mos ketë orare tepër të zgjatura, që ia zënë gjithë kohën, sa në punë, aq në shërbim
të familjes. Duhet pasur mirë parasysh se angazhimet e gruas në jetën familjare, janë
kontribut i paçmuar në të gjitha nivelet e jetës shoqërore e i përkasin edhe ardhmërisë
së shoqërisë. Së fundi Papa pohoi edhe një herë, me forcë, se instituti familjar
është e do të jetë gjithnjë qeliza jetike e shoqërisë.