Касцёл і англійская паліцыя аб’ядналіся супраць гандлю людзьмі
5-6 снежня 2014 г.
у Лондане пройдзе ІІ Міжнародная канферэнцыя на тэму барацьбы з гандлем людзьмі, у
якой прымуць удзел члены так званай “Групы св. Марты” – аб’яднання афіцэраў паліцыі,
экспертаў і духавенства з розных краін свету, задзейнічаных у барацьбе з сучасным
рабствам. Яны абмяркуюць супольныя стратэгіі супрацьдзеяння гэтаму феномену і магчымасці
аказання дапамогі яго ахвярам і іх рэінтэграцыі ў грамадства. Ініцыятарам форума выступіла
Канферэнцыя Біскупаў Англіі і Уэльса, лонданская паліцыя і дэпартамент ураду Вялікабрытаніі,
адказны за міграцыйны кантроль, бяспеку і парадак.
“Група св. Марты” абавязана
сваёй назвай аднайменнаму дому ў Ватыкане, дзе зараз пражывае папа Францішак. Тут
у красавіку 2014 г. праходзіла сустрэча ўдзельнікаў І Міжнароднай канферэнцыі на тэму
барацьбы з гандлем людзьмі са Святым Айцом. Тады Францішак назваў гандль людзьмі і
рабства “адкрытымі ранамі на целе сучаснага грамадства” і “злачынствамі супраць чалавечнасці”.
Паводле
ацэнак Міжнароднай арганізацыі працы, гадавы прыбытак рынку “сучаснага рабства” складае
32 млрд. долараў. Амаль 2,5 млн. чалавек ва ўсім свеце ўжо сталі ахвярамі гандлю людзьмі.