Atë Lombardi: Sa më shumë takohesh, aq më shumë gjindet uniteti
Atë Federiko Lombardi komenton dialogun e Papës në Turqi. Ta dëgjojmë reflektimin
e drejtorit të Sallës vatikanase të Shtypit, në mikrofonin tonë.
Përgjigje:
- Është e qartë se Papa e shikon shërbimin e Pjetrit pikërisht si shërbim, e jo
si sundim. Prej këndej, duhet të jetë e qartë për të gjithë se shërbimi i parisë,
shërbimi i Ipeshkvit të Romës, është shërbim për bashkimin, që arrihet kryesisht përmes
dashurisë, përmes vëllazërisë e me konceptin e sinodalitetit. Ky është element shumë
i rëndësishëm i kësaj papnie, që vë në dukje përkimin me ortodoksët, për të cilët
sinodaliteti është aspekt themelor i udhës së Kishës. E megjithatë, udha që duhet
bërë, mbetet akoma e gjatë. Komisionet përkatëse po studiojnë si mund të interpretohet
problemi i parisë, pa harruar se mbi të peshojnë një mijë vjet përçarje. Nuk është,
prandaj, gjë aq e thjeshtë të sqarohet plotësisht.
Pyetje: - Cilat janë
elementet e reja, në se pati të tilla, gjatë këtyre dy ditëve të takimit?
Përgjigje:
- Sa më shumë takohesh, aq më shumë e do tjetrin e aq më shumë ecën drejt bashkimit.
Fakti që jemi para takimit të katërt, në një kohë kaq të shkurtër papnie, na flet
e na thotë se ka përkim e dëshirë tejet të thellë për të ecur së bashku. E ky element
duket sheshit.
Pyetje: - Papa u kërkoi katolikëve e ortodoksëve të ecin
së bashku edhe që të mund t’i përgjigjen kërkesës për ndihmë të të varfërve, të viktimave
të luftës…
Përgjigje: - Natyrisht, por ekumenizmi, ashtu si edhe dialogu
ndërfetar, nuk ushqehen vetëm me ide. Ushqehen edhe me dëshirën për të jetuar e për
të vepruar së bashku. Tani të gjitha aspektet e angazhimit, që për të krishterët burojnë
edhe nga frymëzimi i qartë ungjillor për drejtësinë, për të mirën e njerëzve, për
shërimin e plagëve të njerëzimit të sotëm - siç janë konfliktet, varfëria, injoranca,
shtypja - të gjitha këto, pra, mund të bëhen së bashku, mbi një bazë të përbashkët,
të pranishme në Ungjill.
Pyetje: - Cilat janë, sipas jush, pamjet që
mbeten nga ky shtegtim… Përgjigje: - Pamjet që më prekën shumë janë ato
të adhurimit të heshtur në xhami, të Papës, që kërkon bekimin e merr bekimin si dhe
puthja e Patrikut. E mendoj edhe edhe për bekimin e përbashkët nga ballkoni, figurë
që e kemi parë edhe me një Papë tjetër, por që mbetet çast shumë shprehës i ecjes
dhe i kundrimit së bashku.