Папа падчас Эўхарыстыі ў Стамбуле: адкрыцца на Святога Духа – стварыцеля еднасці
З пакорай дазволіць
Святому Духу кіраваць сабой, каб усё больш пераўзыходзіць непаразуменні, падзелы
і супярэчнасці і быць пераканаўчымі знакамі адзінства і міру, заклікаў папа Францішак
падчас Эўхарыстыі ў катэдральным касцёле Стамбула, якую цэлебраваў 29 лістапада 2014
г. На літургіі прысутнічалі Патрыярх Канстантынопальскі Барталамей І, Патрыярх сіра-каталіцкай
Царквы Ігнацый ІІІ Юнан, вікарый Армянскай патрыярхіі Канстантынопаля архіепіскап
Арам Ацешан, іншыя мясцовыя іерархі і лідэры пратэстанскіх супольнасцяў. У сваёй гаміліі
Святы Айцец нагадаў, што шматлікія харызматы прысутныя ў Паўсюдным Касцёле складаюць
адно дзякуючы гарманізуючай дзейнасці Святога Духа. “Святы Дух чыніць адзінства ў
Касцёле: адзінства ў веры, у любові, ва ўнутранай еднасці. Касцёл і Цэрквы пакліканы
дазволіць Святому Духу кіраваць сабой, становячыся адкрытымі, паслухмянымі і пакорнымі”,
- сказаў Папа.
Францішак нагадаў, што Святы Дух заўсёды падштурхоўвае рушыць
наперад. У той жа час, чалавеку больш камфортна прабываць у статычным і нязменным
стане. “Касцёл сведчыць аб сваёй вернасці Святому Духу ў той меры, у якой не мае прэтэнзій
на кіраванне Ім і Яго падпарадкаванне”, - падкрэсліў Папа.
Цвёрдая ўпартасць
ва ўласных ідэях і перакананнях, амбіцыі і ганарыстасць перашкаджаюць па-сапраўднаму
разумець іншых і адкрывацца на шчыры дыялог з імі. Полымя Святога Духа, распальвае
сэрца, а не напаўняе розум ідэямі; надзяляе не сілай, але здольнасцю служэння ў любові;
дае магчымасць казаць мовай, якую зможа зразумець кожны, нагадаў Папа.