Demetrios Archondonis lindi më 29 shkurt 1940, në ishullin Imvros, në Detin Egje,
sot Gökçeada, Turqi. Qytetar turk i bashkësisë greke të Turqisë, studioi në Shkollën
Teologjike të Halki(1961), në Institutin Lindor të Romës, Institutin Ekumenik të Bossey
dhe Universitetin e Munihut. I shuguruar diakon më 1961 e meshtar më 1969, u bë sekretar
personal i paraardhësit të tij, Patrikut ekumenik Demetrios (1972-91). Metropolit
i Filadelfies (1973) dhe i Kalçedonisë (1990), ndërsa më 2 nëntor 1991 u zgjodh i
270-ti pasardhës i Shën Andreut, me emrin Bartolomeu I. I njohur, angazhimi i
Bartolomeut I në favor të bashkëpunimit ndër-ortodoks në dialogun ekumenik, si dhe
në mbrojtje të ambientit, aq sa të meritojë emrin “Patriku i gjelbër”. Ka qenë për
herë të parë në Vatikan më 29 qershor 1995, për kremtimin liturgjik të Shën Pjetrit
e të Shën Palit, e pastaj përsëri më 29 qershor 2004, për të përkujtuar takimin historik
të Patrikut Atenagora me Palin VI në Jeruzalem(1946). Bartolomeu I, i pranishëm me
rastin e kremtimit eukaristik, kryesuar nga Gjon Pali II, mbajti një homeli, të paraprirë
nga Papa Vojtila, Pak muaj më parë, më 27 nëntor të të njëjtit vit, Bartolomeu I u
rikthye në Vatikan, në krye të një Delegacioni të Sinodit të Shenjtë, për të marrë
në dorëzim një pjesë të relikeve të dy paraardhësve, Shën Gregor Teologut dhe Shën
Gjon Krizostomit, të ruajtura në bazilikën e Shën Pjetrit. Mbartja e relikeve në Kishën
patriarkale të Shën Gjergjit, natën e festës së Shën Andreut (30 nëntor), qe rast
për organizimin e kremtimeve fetare pan-ortodokse në patriarkanën ekumenike. Bartolomeu
I njeh greqishten, turqishten, italishten, gjermanishten, frengjishten, anglishten
e latinishten. Kujtojmë se Kostandinopoja u ngrit në rangun e Patriarkanës nga Koncili
kishtar i Efezit, në vitin 431 pas Krishtit dhe qe vatër e krishterimit të lashtë
të Lindjes. Patriku ekumenik ka vendin e parë të nderit në Kishat Ortodokse: si primus
inter pares ndërmjet Patrikëve lindorë, është pikë referimi e bashkimi për Kishat
ortodokse.