Святы Айцец звярнуўся да палітычных лідэраў Турцыі

Турцыя, па прычыне свайго геаграфічнага палажэння і важнасці ў рэгіёне мае вялікую адказнасць: яе выбары і прыклад маюць асаблівае значэнне і могуць спрыяць сустрэчы цывілізацый і вызначаць дзейсныя шляхі да міру і сапраўднага развіцця, адзначыў папа Францішак у звароце да прадстаўнікоў турэцкіх уладаў, з якімі сустрэўся 28 лістапада 2014 г. Звяртаючыся да палітыкаў, Святы Айцец нагадаў пра багатую гістарычную спадчыну краіны, а таксама яе старажытную сувязь з хрысціянствам: на гэтай зямлі хрысціянскія супольнасці былі заснаваны яшчэ св. Паўлам, тут праводзіліся першыя сем Сабораў і знаходзіцца месца ў якім, паводле традыцыі, жыла Панна Марыя, заўважыў Пантыфік. Францішак адзначыў важнасць дыялогу, які дапаможа вызнаўцам іслама і хрысціянства лепш пазнаваць адно аднаго, цаніць адметнасці і лічыцца з імі дзеля будавання трывалага спакою, заснаванага на павазе да правоў і абавязкаў звязаных з годнасцю чалавека. Фундаментальна неабходна, каб мусульмане, яўрэі і хрысціяне мелі роўныя правы і абавязкі і маглі карыстацца імі, падкрэсліў Святы Айцец.

Папа з жалем адзначыў, што на працягу многіх гадоў Блізкі Усход застаецца тэатрам братазабойчых войнаў. “Здаецца, адна вайна нараджае другую, як быццам адзіным магчымым адказам на вайну і насілле можа быць толькі новая вайна і новае насілле”, сказаў ён. Пантыфік заахвоціў палітыкаў выкарыстоўваць усе магчымасці перамоў, каб дасягнуць міру і ўстойлівага развіцця.

Важны ўнёсак ў мірны працэс у рэгіёне, на думку Францішка, можа прынесці міжрэлігійны і міжкультурны дыялог, які дапаможа асудзіць фундаменталізм і тэрарызм на рэлігійнай глебе. Фанатызму неабходна супрацьпаставіць салідарнасць вернікаў, заснаваную на павазе да чалавечага жыцця, свабодзе веравызнання і выбару рэлігійнай маралі, намаганнях на карысць дабрабыту і навакольнага асяроддзя, лічыць Папа.

На заканчэнне свайго звароту ён высока ацаніў шчодрасць з якой Турцыя адносіцца да вялікай колькасці бежанцаў, у першую чаргу з Сірыі і Іраку. Міжнародная супольнасць мае маральны абавязак дапамаць у гэтым, адзначыў Францішак.

Святы Айцец нагадаў пра сваю перакананасць у немагчымасці спынення несправядлівага агрэсара любым чынам: праблему трэба вырашаць у рамках міжнароднага права і не толькі вайсковымі метадамі. Пантыфік заклікаў выкарыстоўваць фінансавыя рэсурсы не на ўзбраенні, а на вырашэнне праблем якія спрыяюць з'яўленню тэрарызма: на барацьбу з голадам і хваробамі, на ўстойлівае развіццё і ахову прыроды, выкараненне шматлікіх формаў беднасці і маргінальнасці.