Պոլսոյ Հայ Կաթողիկէ Աւագ Թեմը։

Պոլսոյ Հայ Կաթողիկէ Աւագ Թեմը Հիմնուած է 1830ին՝ Ամենապատիւ եւ գերերջ. Տ.Տ. գրիգոր - Պետրոս Զ. Ճերանեան Կաթողիկոսի օրով:

Թեմին Ա. Առաջնորդը եղած է Արհի. Անտոն Արք. Նուրիճեան: Թեմը, նախ հաստատուած է որպէս նախագահական Արքեպիսկոպոսական Աթոռ 1830 - 1866: Յետագային եղած է Կաթողիկոսական - Պատրիարքական Աթոռ Տանն Կիլիկիոյ 1866 - 1928:

Հուսկ՝ Պատրիարքարանի փոխադրութեամբ Պէրութ, Լիբանան, 1928էն սկսեալ վերածուած է Արքեպիսկոպոսական Աթոռի:


Ներկայիս՝ Թեմիս անդամներուն թիւն է մօտաւորապէս երեք հազար - 3000 - Հոգի որոնց մեծամասնութիւնը կը բնակի Պոլիս: Մայրաքաղաք Անգարայի մէջ եւս ներկայ է վաթսուն ընտանիքներէ բաղկացած փոքրիկ համայնք մը:

Պոլսոյ մէջ կը գործեն չորս ժողովրդապետական եկեղեցիներ.
ա.Աթոռանիստ Ս. Աստուածածին եկեղեցի:
բ.Սամաթիոյ Անարատ Յղութեան եկեղեցի:
գ.Ատըգիւղի - քաղկեդոնի - Ս. Լեւոն եկեղեցի:
դ.Ս. Յովհան Ոսկեբերան եկեղեցի, ի պէյօղլու:

Թեմը ունի, մէկը միւսէն գեղեցիկ 13 եկեղեցիներ, որոնցմէ 12 հատը՝ Պոլիս, իսկ մէկ հատը՝ Մարտին: Կարգ մը եկեղեցիներ կը սպասարկուին ամէն կիրակի, իսկ ուրիշներ միայն ամառուան եղանակին, անոնք գտնուելով ամարանոցի վայրեր: Թեմս ունի երկու երկսեռ երգչախումբ

Թեմէս ներս կը գործեն երկու Միութիւններ եւ այլ բարեսիրական հաստատութիւններ։ Երիտասարդական Միութիւնը եւ Տիկնանց Միութիւնը, մինչ բարեսիրական հաստատութիւններու շարքին են`
ա. Սուրբ Յակոբ Հիւանդանոցը
բ. Սուրբ Յակոբ Հանգստեան Տունը,

գ. Սուրբ Յակոբ բարեգործական Մարմինը,

դ. Սուրբ Յակոբ Դարմանատունը որ օժտուած է արդիական սարքաւորումներով եւ բոլոր ճիւղաւորումներով:

Թեմէն ներս կը գործեն նաեւ չորս դպրոցներ -

ա. Բանկալթիի Մխիթարեան Լիկէոնը:
բ. Պոմուդիի Վեն. Մխիթարեան նախակրթարանը:
գ. Սամաթիոյ Անարատ Յղութեան նախակրթարանը:
դ. Բանկալթիի Անարատ Յղութեան նախակրթարանը: