Пантыфік да касцёльных рухаў: захавайце “свежасць харызмату”
“Захаваць свежасць
харызмату”, - заклікаў Святы Айцец удзельнікаў Сусветнага кангрэсу касцёльных рухаў,
які праходзіў 20-22 лістапада 2014 г. у Рыме. Ён нагадаў, што “рэальнасць важнейшая
за ідэі”, таму “не трэба падманваць сябе, думаючы, што знешнія структуры могуць гарантаваць
дзеянне Святога Духа”. Навізна ў абвяшчэнні Евангелля, дадаў Пантыфік, палягае не
на новых метадах і формах, але, хутчэй, “на гатоўнасці рэагаваць з новым энтузіязмам
на заклік Пана”. Гэта ён назваў “евангельскай мужнасцю”, неабходнай для росту хрысціянскіх
супольнасцяў. “Калі формы і метады становяцца самамэтай, яны ператвараюцца ў ідэалогію,
аддаленую ад рэальнасці”, - заўважыў Папа і дадаў, што ў такім выпадку “формы і метады
задушаць сам харызмат, які даў ім жыццё”.
Францішак заўважыў, што сённяшні
чалавек “адчувае сур’ёзныя праблемы з ідэнтычнасцю” і належным выбарам, у выніку чаго
як бы “дэлегуе” важныя жыццёвыя рашэнні іншым. У такой сітуацыі касцёльныя рухі не
павінны паддацца “спакусе ўзурпацыі свабоды асобы”, але накіроўваць чалавека да росту
ў “натуральнай сталасці”. Папа заклікаў не забывацца, што самы каштоўны дар Святога
Духа, гэта камунія. Яна асабліва важная сёння, калі ў свеце пануюць: падзелы, суперніцтва
і зласлоўе.
Для дасягнення “касцёльнай сталасці”, нагадаў Францішак, патрэбны
таксама місійны дух, бо радасць абвяшчэння Евангелля з’яўляецца асновай дароў Святога
Духа.