Նոյեմբերի 21ին կը լրանայ Վատիկանեան Երկրորդ Տիեզերական Ժողովին ''Unitatis Redintegratio'' Վճիռին 50 ամեակը։

(Ռ.Վ. 19 նոյեմբեր 2014) 21 Նոյեմբեր 1964 թուականին, Տիեզերական ժողովի մասնակցող եպիսկոպոսները` 2137 թեր եւ 11 դէմ ձայներով կը քուէարկեն ''Unitatis Redintegratio'' վճիռը։
Ուշագրաւ է որ նոյն ժամանակ կը վաւերացուին նաեւ ''De Ecclesia'' եւ ''Lumen Gentium'' Սահմանադրութիւնները, ինչպէս նաեւ ''De Ecclesiis Orientalibus Catholicis'' եւ ''Orientalium Ecclesiarum'' վճիռները։
Պօղոս Զ. Քահանայապետ Տիեզերական Ժողովի երրորդ փուլի փակման, կը յայտարարէր թէ ''Unitatis Redintegratio'' վճիռը կը բովանդակէր ''De Ecclesia'' եկեղեցւոյ Սահմանադրութիւնը։
Քրիստոնեաներու Միութեան Քահանայապետական Խորհուրդը կը նշէ այս յիսնամեակը։
Ուրբաթ, 21 Նոյեմբերի առաւօտեան ժամը 9.15ին, ''Կրեկորեանա'' Քահանայապետական Համալսարանի սրահին մէջ, պիտի կատարուի յուշահանդէս, ուր կաթողիկէ եկեղեցւոյ հովիւներ եւ աստուածաբաններ, ինչպէս եւ ներկայացուցիչներ այլ Եկեղեցիներու եւ Հասարակութիւններու, իրենց տեսանկիւնէն պիտի ներկայացնեն Տիեզերական Ժողովի վճիռը։ Ի միջի այլոց իր մասնակցութիւնը պիտի բերէ Կարդինալ Քուրդ Քոխ՝ նախագահ Քրիստոնեաներու Միութեան Քահանայապետական խորհուրդի. իսկ Հայաստանեայց Առաքելական Եկեղեցւոյ Կիլիկեան Աթոռը իր մասնակցութիւնը պիտի բերէ յանձինս Տիկ. Թենի Փիռի Սիմոնեանի։