Апостальская Сталіца ў ААН: павага да рэлігійнай свабоды – гэта больш, чым талерантнасць

Прадстаўнік Апостальскай Сталіцы пры ААН прыняў удзел у сімпозіуме па абароне рэлігійных меншасцяў у свеце. Ён прайшоў 13 лістапада 2014 г. у Эканамічным і Сацыяльным Савеце Арганізацыі Аб’яднаных Нацый у Нью-Ёрку. Арцыбіскуп Бернардзіта Ауса нагадаў, што ў многіх частках свету пастаянна парушаюцца правы рэлігійных меншасцяў па прычыне іх рэлігіі. Прамы пераслед этнічных і рэлігійных меншасцяў, у тым ліку хрысціянскіх супольнасцяў, адбываецца ў паўночным Іраку з боку так званай Ісламскай дзяржавы, чые нецярпімасць і жорсткія ўчынкі ў імя рэлігіі красамоўна кажуць аб велізарнай шкодзе, якую скажэнне рэлігіі можа прынесці людзям і ёй самой.

Святы Пасад лічыць, што гэтыя бязлітасныя рэчы не павінны разглядацца толькі як насілле ў дачыненні да этнічных і рэлігійных меншасцяў, але ў першую чаргу, павінны быць асуджаны як грубыя парушэнні асноўных правоў чалавека. І Арганізацыя Аб’яднаных Нацый павінна паспрыяць гэтаму. Таксама рэлігійныя і палітычныя лідэры пакліканы спрыяць міжрэлігійнаму і міжкультурнаму дыялогу і асуджаць любое незаконнае выкарыстанне рэлігіі для апраўдання экстрэмізму.

Свет, які сапраўды паважае рэлігійную свабоду, павінен выйсці за рамкі простай талерантнасці, падкрэсліў ватыканскі дыпламат.