Святы Пасад зацікаўлены дапамогай людзям з аўтыстычным сіндромам
У Ватыкане 18 лістапада
2014 г. прайшла прэзентацыя міжнароднай канферэнцыі Папскай рады пастырства работнікаў
сферы аховы здароўя пад назвай: “Асобы з разладамі аўтыстычнага спектру: абудзіць
надзею”. Форум адбудзецца 20-22 лістапада 2014 г. у Ватыкане пры ўдзеле вядучых спецыялістаў
у сферы даследвання аўтызму, прадстаўнікоў арганізацый і структур, якія працуюць у
гэтай тэматыцы. Маладыя людзі і дарослыя, што маюць цяжкія формы такога роду расстройстваў,
патрабуюць увагі да сябе з боку сям’і, сацыяльных структур, педагогаў, медыкаў і душпастыраў,
лічыць арцыбіскуп Зыгмунт Зімоўскі, старшыня ватыканскай дыкастэрыі. Да выбару тэмы
сёлетняга форуму, па словах іерарха, прывялі незлічоныя цяжкасці, у тым ліку: этычныя,
маральныя і духоўныя, з якімі сутыкаюцца асобы, што займаюцца пытаннямі людзей з аўтызмам.
У канферэнцыі прымуць удзел 650 асоб з 57 краін. Яе асноўная мэта – знайсці
і вызначыць правільныя інструменты для духоўнай апекі над тымі, хто прама ці ўскосна
пакутуе ад аўтыстычнага сіндрому, даць станоўчы імпульс асобам, якія жывуць у складанай
сітуацыі хваробы, а таксама спецыялістам у галіне аховы здароўя, асацыяцыям і членам
сям’яў.
Удзельнікаў міжнароднай канферэнцыі прыме на аўдыенцыі папа Францішак.