Papa: fëmijët kanë të drejtë të kenë babë e nënë, jo familje ideologjike
“Fëmijët kanë të drejtë të rriten në një familje, me një babë e me një nënë, të aftë
të krijojnë një ambient të përshtatshëm për zhvillimin dhe maturimin e ndjenjave të
tyre”: kështu tha Papa Françesku në takimin me pjesëmarrësit e Kuvendimit ndërkombëtar
mbi përplotësimin e burrit me gruan, organizuar në Vatikan nga Kongragata për Doktrinën
e Fesë. Ati i Shenjtë nënvizoi se nuk duhet ta përkufizojmë familjen, duke u nisur
nga koncepte ideologjike, që karakterizojnë vetëm një çast historik e më pas, lihen
mënjanë. Familja është çështje antropologjike, që ka të bëjë me fatin e njeriut. Papa u ndal në
fjalën “përplotësim”, kuptimi i së cilës shpjegohet farë mirë në Letrën e parë të
Shën Palit Apostull drejtuar Korintianëve. Aty thuhet se Shpirti Shenjt e ka pajisur
secilin prej nesh me dhurata personale, që mund të plotësojnë njëra-tjetrën, ashtu
si çdo gjymtyrë e njeriut kontribuon për të mirën e krejt trupit. Fjala kyçe për të
kuptuar këtë bashkëpunim është “harmonia” e pikërisht Shpirti Shenjt arrin të krijojë
“harmoninë” e Gjithësisë, sepse Zoti – autor i Krijimit – i ka bërë gjërat në mënyrë
të tillë, që të plotësojnë njëra-tjetrën. Kështu, edhe ndërmjet burrit e gruas, theksoi
Papa Françesku. Përplotësimi ndërmjet tyre është baza e familjes, shkolla e parë
ku vlerësojmë dhuratat e Zotit për ne e për të tjerët, ku mësojmë artin e të jetuarit
të gjithë së bashku, ku thithim vlerat e idealet e ku shprehim virtytet e dashurinë.
Familjet, vuri në dukje Papa, janë edhe vende ku ndihet tensioni ndërmjet egoizmit
e altruizmit, ndërmjet arsyes e pasionit, ndërmjet dëshirave të menjëhershme e objektivave
afatgjatë… Por, në gjirin e familjes, gjehet edhe zgjidhja për këto tensione:
“Kur flasim për përplotësim ndërmjet burrit e gruas në këtë kuadër, nuk duhet ta ngatërrojmë
këtë term me idenë e thjeshtëzuar se të gjitha rolet dhe marrëdhëniet e të dyja sekseve
përmblidhen në një model unik e statik. Përplotësimi përmban shumë forma, sepse çdo
burrë e çdo grua sjell kontributin personal në martesë dhe në edukimin e fëmijëve.
Sjell trashëgiminë e vet personale, karizmën personale e kështu, përplotësimi kthehet
në pasuri të madhe. E jo vetëm është pasuri, por edhe bukuri”. Në kohët që
jetojmë, vuri në dukje Ati i Shenjtë, familja e martesa janë në krizë. Mbizotëron
kultura e së përkohshmes, ku gjithnjë e më shumë njerëz heqin dorë nga martesa si
impenjim publik: “Ky revolucion i zakoneve dhe i moralit bëhet shpesh duke
valëvitur flamurin e lirisë(në thonjza), por, në të vërtetë, ka sjellë shkatërrimin
shpirtëror e material për njerëz pa fund, sidomos për më të brishtët. Është e qartë
gjithnjë e më tepër se rënia e kulturës së martesës shoqërohet me rritjen e varfërisë
e me një sërë problemesh të tjera shoqërore, që dëmotojnë sidomos gratë, fëmijët dhe
të moshuarit. Janë pikërisht ata, që vuajnë më shumë në këtë krizë. Kriza e familjes
ka sjellë krizën e ekologjisë njerëzore, sepse ambientet shoqërore, ashtu si ambientet
natyrore, kanë nevojë të mbrohen. Megjithëse njerëzimi e ka kuptuar tashmë nevojën
për t’u përballur me gjithçka përbën kërcënim për ambientin natyror, jemi të ngadalshëm
– vërtet të ngadalshëm eh, edhe ne, të kulturës katolike – jemi të ngadalshëm e mezi
e kuptojmë se edhe ambienti shoqëror është në rrezik. Prandaj, është e domosdoshme
të promovohet një ekologji e re njerëzore”. Duhet të kujdesemi më shumë për
shtyllat themelore, mbi të cilat ngrihet një komb, nënvizoi Papa Françesku. E këto
janë pasuritë jomateriale: “Familja mbetet themeli i bashkëjetesës dhe i garancisë
kundër shpërbërjes shoqërore. Fëmijët kanë të drejtë të rriten në një familje, me
babë e nënë, të aftë të krijojnë një ambient të përshtatshëm për zhvillimin dhe për
maturimin e ndjenjave të tyre. Për këtë arsye, në Nxitjen Apostolike ‘Evangelii gaudium’,
e kam theksuar kontributin ‘e domosdoshëm’ të martesës në shoqëri, kontribut, që ‘shkon
përtej nivelit të emocioneve dhe të nevojave, që kanë të bëjnë me çiftin’ (n.66)”. Papa
shprehu mirënjohjen që në Kuvendimin në vijim në Vatikan, theksohen të mirat, që
martesa u sjell fëmijëve, vetë bashkëshortëve dhe shoqërisë. I ftoi pjesëmarrësit
të venë në dukje një të vërtetë tjetër për familjen, faktin se solidariteti, besnikëria
dhe dashuria e anëtarëve të saj janë përgjigjja për dëshirat më të thella të zemrës
njerëzore. Kjo është shumë e rëndësishme, sidomos për të rinjtë, të cilët duhet të
dinë të shkojnë kundër rrymës, theksoi Ati i Shenjtë: “Nuk duhet të biem në
kurthin e atyre, që na gjykojnë me koncepte ideologjike. Familja është çështje antropologjike
e si rrjedhojë, edhe çështje shoqërore, kulturore… E ne nuk mund ta cilësojmë me koncepte
të natyrës ideologjike, të cilat mbizotërojnë në një çast të historisë e, pastaj,
bien. Sot, nuk mund të flitet për familje konservatore, ose për familje progresiste:
familja është familje. Të mos lejojmë ta cilësojnë kështu, duke u nisur nga ky, apo
ai koncept, me natyrë ideologjike. Familja është e tillë në vetvete, ka forcë në vetvete”. Në
fund, Papa Françesku ripohoi se në shtator 2015 do të shkojë në Filadelfia të SHBA-ve
për Takimin Botëror të Familjeve.