Papa: përballë krizës, të shikohet njeriu, jo burokracia
“Në gjendjen aktuale të krizës, është e nevojshme, më shumë se kurrë, të ndihmohen
njerëzit, duke vlerësuar arsyet e dinjitetit njerëzor, përballë ngurtësisë së burokracisë”:
këtë theksoi Papa, duke u takuar, në Sallën e Palit VI, me pjesëmarrësit e Kongresit
botëror të komercialistëve. Sot, tha në vijim, puna mbetet problem kyç: jemi përballë
realitetit dramatik të një mori njerëzish, që kanë punë të pamjaftueshme ose që e
kanë humbur fare. Përballë një mori familjesh, që i paguajnë pasojat; përballë shumë
të rinjve, në kërkim të punësimit të parë e të vijimit të punës dinjitoze. Të shumtë
janë ata, e sidomos emigrantët, të cilëve u mungojnë garancitë më fillestare juridike
dhe ekonomike, sepse detyrohen të punojnë ‘punë të zeza’. Në këtë kontekst, vijoi,
është më i fortë tundimi të mbrosh interesat vetjake, sesa të shqetësohesh për të
mirën e përbashkët, pa e vrarë shumë mendjen për drejtësinë e ligjshmërinë. Prandaj
u kërkohet të gjithëve, e posaçërisht ushtruesve të profesionit që ka të bëjë me funksionimin
e mirë të jetës ekonomike të një vendi, të luajnë rol pozitiv, konstruktiv, në kryerjen
e përditshme të punës së tyre, duke e pasur mirë parasysh se pas çdo karte, është
një histori, është një fytyrë njerëzore. Në këtë detyrë, profesionisti i krishterë
e kryen mirë punën e tij, me aftësinë për të shkuar përtej…: “… gjë që do të
thotë ta ndihmosh njeriun në vështirësi; të ushtrosh atë krijimtari, që të lejon të
gjesh rrugëzgjidhje në situata të bllokuara; të vlerësosh arsyet e dinjitetit njerëzor,
përballë ngurtësisë së burokracisë”. Është e nevojshme, vërejti Papa, të vihet
gjithnjë në qendër njeriu, me dinjitetin e tij, duke iu kundërvënë dinamikave, që
priren të pranojnë gjithçka e të venë në majë të majës paranë: “Kur paraja bëhet
qëllimi e arsyeja e çdo veprimtarie, e çdo nisme, atëhere fiton epërsi optika e dobisë
si dhe logjikat e egra të fitimit, që nuk i respekton personat, me një pasojë shumë
të përhapur: rënien e vlerave të solidarietit e të respektit për njeriun. Ata që punojnë
në sektorë të ndryshëm të ekonomisë e të financës, janë të thirrur të zgjedhin rrugë,
të cilat favorizojnë mirëqenien shoqërore dhe ekonomike të mbarë njerëzimit, duke
u krijuar të gjjthëve mundësi për ta relizuar zhvillimin e tyre”. Papa Françesku
i inkurajoi komercialistët të punojnë gjithnjë me përgjegjësi, të favorizojnë marrëdhëniet
e ndershmërisë e të drejtësisë e, po të jetë e mundur, edhe të vëllazërisë, duke përballuar
me guxim, posaçërisht problemet e njerëzve më të ligësht e më të varfër: “Nuk
mjafton t’u japësh përgjigje konkrete problemeve ekonomike e materiale, duhet nxitur
e kultivuar etika e ekonomisë, e financës dhe e punës; duhet mbajtur gjallë vlera
e solidarietit – e kësaj fjale, që rrezikohet të dalë fare jashtë fjalorit, sot: solidarietet…-
solidaritet, parë si sjellje morale, si shprehje e vëmendjes për tjetrin në çdo kërkesë
të tij legjitime”. Duhet globalizimi i solidaritetit, përfundoi Papa, në harmoni
me ndihmën. Falë efektit të këtyre dy parimeve, proceset shkojnë në shërbim të njeriut
e shtohet drejtësia, pa të cilën nuk mund të ketë paqe të vërtetë e të qëndrueshme.