Новы сакратар па адносінах з дзяржавамі не ўпэўнены, што папская дыпламатыя – гэта
пакліканне
Папа Францішак прызначыў
арцыбіскупа Пола Рычарда Галахера сакратаром па адносінах з дзяржавамі – гэта трэцяя
па значнасці пасада ў ватыканскай дыпламатыі, эквівалентная пасадзе міністра замежных
спраў. “У першую чаргу, я – святар, а ўжо потым дыпламатычны прадстаўнік Святога Айца”,
- сказаў арцыбіскуп Галахер у інтэрв’ю Ватыканскаму радыё, у якім ён распавёў пра
свой асабісты досвед і ўнёсак ватыканскай дыпламатыі ў рашэнне праблем міжнароднай
супольнасці. Ён “не ўпэўнены, што папская дыпламатычная служба з’яўляецца пакліканнем”.
На яго думку, пакліканне – гэта святарства, і яго трэба дбайна захоўваць, каб зрабіць
штосьці сапраўды пазітыўнае. Тым не менш, дыпламатыя можа зрабіць вялікі ўклад у інфармацыйна-камунікацыйную
і прадстаўніцкую дзейнасць Касцёла, бо яна “тлумачыць” мясцовыя Касцёлы – Рыму, а
Рым – мясцовым Касцёлам.
Жыццё ў розных краінах пераканала арцыбіскупа Галахера
ў тым, што многія праблемы ўзаемазвязаны. Да найбольш сур’ёзных глабальных праблем
ён адносіць развіццё чалавека і дзяржаў, канфлікты, беднасць і эканамічную адсталасць.
У
адказ крытыкам, якія заяўляюць, што Каталіцкаму Касцёлу як рэлігійнаму інстытуту не
трэба падтрымліваць палітычна-дыпламатычныя адносіны з урадамі краін свету, арцыбіскуп
Галахер адказаў так: “Гэта гістарычнае пытанне, так склалася наша эвалюцыя”. Ён падкрэсліў,
што свет прызнае ўклад ватыканскай дыпламатыі, дзейнасць якой заснавана не толькі
на веры, але і на досведзе і гісторыі Касцёла.
Шасцідзесяцігадовы арцыбіскуп
Галахер родам з Ліверпуля. Ён зойме пасаду сакратара па адносінах Апостальскай Сталіцы
з дзяржавамі пасля больш трыццаці гадоў дыпламатычнай службы на ўсіх кантынентах.
Да гэтага, ён служыў у місіях Святога Пасада ў Танзаніі, Уругваі, на Філіпінах, быў
назіральнікам пры Еўрапейскім парламенце ў Страсбургу, нунцыем у Бурундзі, Гватэмале
і Аўстраліі. Новы сакратар па адносінах з дзяржавамі добра знаёмы з дзейнасцю Дзяржсакратарыята
Апостальскай Сталіцы, дзе ён працаваў у1995-2000 гадах разам з цяперашнім Дзяржсакратаром
Пьетра Паралінам. Арцыбіскуп Галахер добра валодае італьянскай, іспанскай і французскай
мовамі.