Imzot Nykiel: vula e Rrëfimit është gjithnjë e pacënueshme
Më se dyqind pjesëmarrës ishin të pranishëm sot pasdite në kuvëndimin, mbajtur pranë
Pallatit të Kancelarisë, në Romë, organizuar nga Pendestaria Apostolike, kushtuar
temës: “Vula e rrëfimit dhe fshehtësia baritore”. Folëm me ipeshkvin Kezysztof
Nykiel, regjent i Pendestarisë:
Përgjigje: - Tema e sekretit të
rrëfimit lidhet posaçërisht me mënyrën e sotme të jetesës. Nuk është gjë e re që në
kulturën e ashtuquajtur mediatike, njerëzit mbingarkohen me informacione të tepërta,
trullosen nga të dhëna të panumërta kronikash ose, thjesht, lodhen, sepse ditë për
ditë përfshihen në vorbullën e viviseksioneve, të dëshirës për t’u dukur ose të përvojës
e të ngjarjeve të jetuara. Prandaj njeriu modern ka nevojë të gjejë një hapësirë,
ku të mund ta dëgjojnë, ku të mund ta hapë zemrën, ku të jetë i sigurt se nuk i del
kurrë fjala, përkundrazi, i ruhet e i mbrohet. E ku ka hapësirë më të mirë, se rrëfyestorja?
Kushdo që shkon në rrëfyestore, mund t’i provojë efektet paqëtuese e shëruese të ndjesës
pa kusht të Zotit e, njëkohësisht, ka të drejtën të jetë plotësisht i sigurt se çka
rrëfeu në ndërgjegjen sakramentore, do të mbetet e vulosur përgjithnjë, edhe pasi
të ketë vdekur.
Pyetje: - Aktualisht ka një farë humbjeje të kuptimit
të mëkatit? Pse?
Përgjigje: - Është e vërtetë. Posaçërisht ndërmjet
të rinjve vërejmë një zbehje në rritje të domethënies së mëkatit. Shkaku kryesor i
kësaj humbjeje, besoj, duhet kërkuar kryesisht tek përjashtimi i Zotit nga horizonti
kulturor modern. Shumë njerëz nuk e vënë më Zotin në qendër të jetës së tyre. Nuk
ia njohin përparësinë, që i takon. Gjithçka sot është e lejueshme. Opinioni personal
është e vetmja e vërtetë. Prej këndej njeriu modern e ka të vështirë ta pranojë mëkatin
e të kërkojë falje, gjë që shpjegon, në rrënjë, edhe vështirësitë e praktikës së krishterë
të rrëfimit ose të sakramentit të pajtimit me Zotin. Ne, që shërbejmë në këtë Gjykatë
të mëshirës e të hirit, i jemi shumë mirënjohës Atit të Shenjtë Françeskut për fjalimet
dhe inkurajimet drejtuar besimtarëve, që të mos dyshojnë kurrë për të vërtetën se
mëshira e Zotit është gjithnjë më e madhe nga çdo mëkat, e, prej këndej, t’i afrohen
me besim rrëfyestores.
Pyetje: - Që kur nisi t’i kushtohet vëmendje
e posaçme sekretit të Rrëfimit?
Përgjigje: - Praktikisht, gjithmonë.
Kisha, që nga zanafilla, i ka kushtuar vëmendje të posaçme fshehtësisë së takimit
të mëkatarit me meshtarin në mbarshtimin e Sakramentit të Rrëfimit. Por, që me Koncilin
Lateranens IV (1215), një kanun i posaçëm sanksionon për herë të parë detyrimin moral
e juridik, si ligj universal i Kishës, duke parashikuar masa të rënda ndëshkimore
për meshtarët, që nuk e respektojnë sekretin e Sakramentit.
Pyetje: -
Si e disiplinon dhe e rregullon ligjshmëria kishtare në fuqi fshehtësinë e rrëfimit?
Përgjigje:
- Kodi aktual, në kanunin 983, thotë kështu: “Fshehtësia sakramentore është e
paprekshme, prandaj rrëfyesi e ka të ndaluar ta tradhtojë, qoftë edhe pjesërisht,
pendestarin, me fjalë ose me çfarëdo mënyre tjetër e për çdo lloj arsyeje. Ky parim
i pacënueshmërisë absolute të sekretit të Sakramentit, ka për qëllim të ruajë shenjtërinë
e vetë Rrëfimit si dhe emrin e mirë të pendestarit. Fshehtësia sakramentore, duhet
kujtuar, përbën një element themelor, cilësues e shfuqizues të Sakramentit të Pendesës,
sepse zbulon e nxjerr në pah thelbsisht karakterin e tij hyjnor, e kjo është edhe
arsyeja kryesore, që tregon pse rrëfimi është e duhet të jetë gjithnjë “dëgjimor”
e jo publik.
Pyetje: - Çfarë ndikimesh pozitive pret Pendestaria Apostolike
nga ky takim, posaçërisht në fushën baritore, në veprimtarinë e rrëfyesve dhe të meshtarëve,
që kujdesen për shpirtrat? Përgjigje: - Natyrisht, atë që ka lidhje me thellimin
e vëmendjes për ruajtjen e sekretit të rrëfimit, qoftë edhe me flijimin e jetës,
siç ndodhi me Shën Gjon Nepomuçenin, që pranoi të hidhej në Moldavë e të vdiste i
mbytur në ujë, po sekretin e Rrëfimit nuk e tradhtoi. Kisha është aq xheloze për shenjtërinë
e vulës sakramentore, sa as vdekja e pendestarit nuk mund ta zgjidhë rrëfyesin nga
ky detyrim. Ligji i fshehtësisë sakramentore nuk pranon asnjë përjashtim. Asnjë rrëfyes
nuk mund të shkarkohet nga çdo detyrim, edhe nëse e ka treguar përmbajtjen e rrëfimit
për të shmangur ndonjë të keqe të madhe.
Pyetje: - Shkelqësi, Sakramenti
i Rrëfimit është mundësi për t’i ndihmuar besimtarët ta marrin Krishtit në zemrat
e tyre. Mund të na e sqaroni më mirë, edhe në këndvështrimin kanonik, ç’rëndësi ka
rrëfyestorja në këtë takim personal e intim me Zotin?
Përgjigje: - Të
krishterët e pagëzuar janë të sigurt se Zoti i fal vetëm përmes Sakramentit të Rrëfimit.
Në fakt, Kodi i së Drejtës Kanonike në fuqi pohon se “rrëfimi individual dhe i plotë,
si dhe zgjidhja e mëkateve, janë e vetmja mënyrë e zakonshme, përmes së cilës besimtari,
i vetdijshëm për mëkatin e rëndë, pajtohet me Hyjin e me Kishën” (Kanuni 959-960).
Papa Françesku, në audiencën e përgjithshme të 19 shkurtit 2014, e nënvizoi këtë rëndësi
të posaçme, këtë veçori të rrëfimit individual: “Nuk mjafton t’i lypësh Zotit falje
në mendjen tënde e në zemrën tënde, por është e nevojshme t’ia rrëfesh me përvujtëri
e besim mëkatet tua shërbyesit të Kishës”. Kur pendestari hyn në rrëfyestore, e ndjen
vërtet veten pranë dashurisë së Zotit, hyn në zemrën mëshirëmadhe të Hyjit, i vetmi
që mund t’ia shërojë plagët e shpirtit e t’ia shlyejë mëkatin, që e pengon të mbetet
në miqësi me Të.