Françesku: Mbretëria e Zotit rritet në heshtje, pa bujë
Mbretëria e Zotit rritet çdo ditë falë atyre, që e dëshmojnë pa bërë zhurmë, duke
u lutur e duke i jetuar me fe impenjimet në familje, në punë e në bashkësinë, së cilës
i përkasin. Papa Françesku e përqendroi në këtë mendim, homelinë e meshës së mëngjesit
në Shtëpinë e Shën Martës. Në heshtje, vuri në dukje Ati i Shenjtë, ndoshta në
një shtëpi ku në fund të muajit mbetet vetëm një euro, e megjithatë, nuk resht lutja,
kujdesi për fëmijët, vëmendja për gjyshërit: aty gjendet Mbretëria e Zotit. Larg nga
dritat e skenës, sepse Mbretëria e Zotit nuk tërheq vëmendjen, njësoj si nuk tërheq
vëmendjen fara, që rritet nën tokë. Në pjesën e sotme të Ungjillit sipas Lukës, pyetjes
së farisnjve “Kur do të vijë Mbretëria e Zotit?”, Jezusi i përgjigjet: “do të vijë
një ditë, në të cilën do t’ju thonë: ‘Është këtu’, ose ‘Është atje’. Mos shkoni, mos
i ndiqni”. Mbretëria e Zotit, theksoi Papa, nuk është spektakël, sepse shfaqja është
shpesh karikatura e Mbretërisë së Hyjit: “Spektakli! Zoti kurrë nuk thotë se
Mbretëria e Zotit është spektakël. Është festë! Ndryshe, pra. Sigurisht që është festë
shumë e bukur. Festë e madhe! E në Qiell është festë, por jo spektakël. Por, dobësia
jonë njerëzore preferon spektaklin”. Shpesh, vijoi Papa Françesku, edhe kremtimi
kishtar mund të kthehet në spektakël. Si për shembull, dasmat, ku nganjëherë, njerëzit
vijnë për të treguar sa bukur janë veshur, vijnë për modë, për t’u mburrur, por jo
për Sakramentin. Ndërsa Mbretëria e Zotit nuk bën bujë, rritet brenda nesh, në heshtje.
Duke cituar Jezusin, Ati i Shenjtë vuri në dukje se edhe për Mbretërinë e Hyjit do
të vijë dita të manifestohet me forcë, por kjo do të ndodhë në fundin e kohrave: “Në
ditën, që do të bëjë zhurmë, do ta bëjë si rrufeja, që vrullshëm shkrepëtin nga një
skaj i qiellit në tjetrin. Kështu do të bëjë Biri i njeriut në ditën e Tij, në ditën
e zhurmshme. Kur mendojmë për qëndresën e sa e sa të krishterëve, që kujdesen për
familjen – burra e gra – që ndjekin fëmijët, u rrinë pranë gjyshërve e arrijnë në
fund të muajit vetëm me gjysëm euro, por luten: aty është Mbretëria e Zotit, e fshehur
në shenjtërinë e jetës së përditshme. Sepse Mbretëria e Zotit nuk është larg prej
nesh, është afër! Kjo është njëra nga karakteristikat e saj: afërsia e përditshme”. Edhe
kur përshkruan kthimin e Tij në lavdi e pushtet, Jezusi, vërejti Papa Françesku, shton
menjëherë se “më parë, është e nevojshme që ai të vuajë shumë e të përbuzet nga ky
brez”. Kjo do të thotë se vuajtja, kryqi, kryqet e përditshme të jetës, janë pjesë
e Mbretërisë së Zotit. E në fund, Ati i Shenjtë i kërkon Hyjit hirin për t’u kujdesur
për Mbretërinë e Zotit brenda nesh, me anë të lutjes, adhurimit, shërbimit, bamirësisë,
gjithnjë pa bujë, gjithnjë, në heshtje: “Mbretëria e Zotit është e përvuajtur,
si fara: e përvuajtur, por e madhe, sepse ka forcën e Shpirtit Shenjt. Ne duhet ta
lëmë të rritet brenda nesh, pa u mburrur: ta lejojmë Shpirtin Shenjt të vijë e të
na e ndryshojë shpirtin tonë, të na bëjë të ecim përpara në heshtje, në paqe, në qetësi,
në afërsi me Zotin, me të tjerët, në adhurim për Zotin, pa bujë”.