Dushe për të pastrehët në Vatikan. Don Krajewski: t’u rijepet dinjiteti njerëzve

Do të fillojnë të hënën, më 17 nëntor, punimet për realizimin e tre dusheve për të pastrehët, nën kolonatin e Shën Pjetrit në Vatikan. Nisma është marrë nga Lëmoshtari Papnor, imzot Konrad Krajewski dhe është miratuar menjëherë nga Papa Françesku. Ideja e meshtarit polak është realizuar tashmë nga dhjetë famulli romake, njëra prej të cilave është ajo e rrugës Gregori VII, fare afër Vatikanit.
“Ne u rijapim dinjitet këtyre njerëzve, të cilët kështu, mund të lahen – nënvizon don Konradi. Nëse bëni një xhiro në Romë e kërkoni një banjo publike – vë në dukje Lëmoshtari i Papës – do të vini re se ato nuk ekzistojnë. E nëse i gjeni, janë me pagesë, si për shembull, banjot në stacionet hekurudhore. Sigurisht, ekzistojnë dushe në Romë, sepse janë ato të Bashkësisë së Shën Egjidit, të Karitasit e të disa famullive. Por unë doja që këto dushe të ishin në ato famulli, që kanë edhe mensën për të varfërit. Të pastrehët shkojnë aty për të ngrënë e atëherë, nëse 2-3 ose 5 prej tyre kanë mundësinë për t’u larë e pastruar, po të llogarisim 10 famulli, do të thotë se në një ditë, 50 vetë mund ta shfrytëzojnë këtë mundësi, ndërsa në 10 ditë, bëhen 500”.
“Ky – vazhdon imzot Krajewski – është shërbim normal, që duhet të organizohet nga komuna, jo nga ne. Por, projektet nuk i bëjmë ne e derisa të realizohen, ndoshta kalon një vit, dy ose 10 vjet… Por, Ungjilli na impenjon ‘sot’. Sot duhet t’i ndihmojmë njerëzit, jo nesër. E kjo gjë mund të bëhej menjëherë, thjesht, duke folur me famullitarët, të cilët u vunë dushe banjove. Tani, këto i përkasin famullisë, prandaj askush nuk mund të dërgojë aty një polic, që thotë: “Jo, nuk respektoni normativën e Bashkimit Evropian, prandaj do t’i mbyllim dushet e banjot’. Kjo është mikpritja e famullitarit, e bashkësisë famullitare, sepse banjot i përkasin strukturës së famullisë, nuk janë publike. Kush më vjen në shtëpi, varet prej meje: e kështu, mundëm ta realizojmë këtë menjëherë. Sikur të prisnim vulën e këshilltarëve e të përgjegjësve të ndryshëm, do të kalonin muaj e vite! Kurse kështu, brenda disa javësh gjithçka është gati”.
“Ne – përfundon don Konradi – jemi ndërhyrja e shpejtë e Papës Françesku e fondet tona duhet të shpërndahen në mënyrë ungjillore. Dushet për të pastrehët janë bekim për shumë vetë, edhe për vetë qytetin. Kaq mund të bëjmë ne, n’e tonën”.