Францішак нагадаў пра студэнтаў, зніклых у Мексіцы
Святы Айцец нагадаў
12 лістапада 2014 г. падчас агульнай аўдыенцыі пра драму 43 мексіканскіх студэнтаў,
зніклых у верасні, і, на думку органаў юстыцыі, спаленых жыўцом членамі мясцовага
наркакартэля. Папа Францішак выказаў сваю блізкасць з сем’ямі маладых людзей. Гэта
падзея, на яго думку, дэманструе драматычную рэальнасць любога роду злачынства, звязанага
з незаконным абаротам наркотыкаў. Францішак звярнуўся таксама да прадстаўнікоў узброеных
сіл Чылі, прысутных на плошчы св. Пятра ў 30-ю гадавіну падпісання мірнай дамовы паміж
Аргентынай і Чылі, і падкрэсліў важнасць дыялогу. “Толькі тады, калі ёсць воля да
дыялогу, можна вырашаць розныя праблемы. Я таксама ўдзячны св. Яну Паўлу II і кардыналу
Саморэ, якія так шмат зрабілі для дасягнення гэтага міру паміж намі. Давайце верыць,
што ўсе народы, якія знаходзяцца ў стане канфлікту, ці з прычыны мяжы, ці культурных
пытанняў возьмуць на сябе заданне ліквідаваць іх за сталом дыялогу, а не выкарыстоўваючы
жорсткасць вайны”, - сказаў папа Францішак.