Sot, në Pallatin Apostolik në Vatikan, Papa Françesku priti në audiencë Presidentin
e Republikës së Ganës, John Dramani Mahama, i cili u takua më pas me autoritetet e
tjera të Selisë së Shenjtë. “Gjatë bisedës së përzemërt – vihet në dukje në notën
e Sallës së Shtypit – u përmendën marrëdhëniet e mira ekzistuese ndërmjet Selisë së
Shenjtë dhe Ganës, duke nënvizuar kontributin pozitiv, që jep Kisha Katolike në fushën
shoqërore, edukative dhe shëndetësore, si edhe në promovimin e dialogut ndërmjet komponenteve
të ndryshme të shoqërisë. Gjithashtu, u fol edhe për kontributin e saj në të mirë
të familjes. Së fundi, u diskutuan çështje të aktualitetit ndërkombëtar e, sidomos,
kriza e rëndë humanitare, shkaktuar nga epidemia e virusit Ebola në Afrikën Perëndimore”.