Papa kujton rënien e Murit të Berlinit: bota ka nevojë për ura!
Në lutjen e sotme të Engjëllit të Tënzot, Papa Françesku foli për 25-vjetorin e shembjes
së Murit të Berlinit, duke e konsideruar si simbol i përçarjes. Nisi të kujtojë, por
u ndërpre nga duartrokitjet e stuhishme dhe nga fluturimi i një pëllumbi që, me krahët
e erës, e mbartën gëzimin e romakëve e të shumë e shumë të huajve, të mbledhur në
Sheshin e Shën Pjetrit, deri tek Porta e Brandenburgut e tek sheshet dhe udhët e
kryeqytetit gjerman, ku kjo ngjarje e madhe kremtohet prej ditësh me durtrokitje,
zëra, muzikë, heshtje, emocione. Kremtohet kështu dita e rilindjes së Evropës, e ringjalljes
së saj, dalja në dritë, nga rrënojat prej çimentoje e hekurishtash që, për 30 vjet
me radhë, ngujuan e ndanë vise e njerëz. Papa Françesku mori pjesë në entuziazmin
e përgjithshëm, duke folur me gojën e Kishës për ngjarjen e madhe, për shembjen e
atij, të cilin e quajti: “simbol i ndarjes ideologjike të Evropës e të mbarë botës”:
“U shemb papritmas, pasi kjo shembje u bë e mundur përmes angazhimit të një
mori njerëzish, që luftuan, u lutën, vuajtën, disa deri në flijimin e jetës, për t’ia
arritur kësaj dite. Ndërmjet tyre, një rol protagonisti pati Ati i Shenjtë Gjon Pali
II”. Historia është mësuese e jetës e Papa Françesku i ngriti sytë nga muri,
që nuk është më, për të kërkuar shembjen e të gjitha mureve, që vijojnë t’i ndajnë
edhe sot e kësaj dite popujt me çimenton e formave të tjera të diskriminimit: “Të
lutemi që, me ndihmën e Zotit e bashkëpunimin e mbarë njerëzve vullnetmirë, të përhapet
gjithnjë më shumë kultura e takimit. Kjo kulturë është e aftë t’i shembë të gjitha
muret që e ndajnë edhe sot e kësaj dite botën e të mos ndodhë kurrë më që njerëz të
pafajshëm të persekutohen e deri edhe të vriten për shkak të besojmës e të fesë së
tyre. Ku ka mure, ka edhe zemra të mbyllura! Na duhen ura, jo mure!”. Kjo thirrje
plot ngazëllim e Papës, lidhej ngusht me reflektimin, që i parapriu lutjes së Engjëllit
të Tënzot. Duke folur për Kushtimin e Bazilikës Lateranense, kremtuar sot nga Kisha,
nënvizoi se kuptimi shpirtëror i kësaj feste duhet të jetë gjithnjë ai i unitetit,
që përfaqëson kjo Bazilikë për të gjitha bashkësitë e krishtera, si seli e hershme
e Ipeshkvit të Romës. Papa Françesku vërejti se pikërisht “bashkimi i të gjitha Kishave”...: “...
për analogji, na nxit të angazhohemi që njerëzimi t’i kapërcejë kufijtë e armiqësisë
e të indiferencës, të ndërtojë ura mirëkuptimi e dialogu, për ta bërë mbarë botën
një familje popujsh të pajtuar, vëllezër solidarë”. Duhen tulla, për të ndërtuar
një kishë, shpjegoi akoma Françesku, por duhet shpirt, që këto tulla të marrin jetë
në jetën e të krishterëve, gurë të gjallë, të thirrur, pohoi Papa, për detyrën e koherencës: “E
nuk është e lehtë, e dimë të gjithë, koherenca e fesë dhe e dëshmisë; por ne duhet
të ecim përpara e ta bëjmë këtë koherencë të përditshme në jetën tonë. ‘Ky është i
krishteri!’. Jo për atë që thotë, por për atë që bën, për mënyrën si sillet. E këtë
koherencë, që na jep jetë e që është hir i Shpirtit Shenjt, duhet ta lypim”. Kisha,
përfundoi Françesku, është e thirrur të jetë në botë bashkësi që, e rrënjosur në Krishtin
përmes Pagëzimit, shpall me përvujtëri e guxim besimin në Të, duke e dëshmuar edhe
përmes dashurisë së krishterë. Pas lutjes së Engjëllit të Tënzot, Ati i Shenjtë
kujtoi ‘Ditën e Falënderimit” që kremtohej në Itali: “Bashkoj zërin me ipeshkvijtë
duke uruar një angazhim të ri, që askujt të mos i mungojë buka e përditshme, të cilën
Zoti e dhuron për të gjithë. Jam pranë botës së bujqësisë dhe e inkurajoj ta kultivojë
tokën në mënyrë të qëndrueshme e solidare”.E nga Italia, në Romë, përshëndetja
e Papës iu drejtua dioqezës kapitoline, në festën kushtuar Ditës për mbrojtjen e gjithësisë,
ngjarje, kujtoi Papa, që na kujton se duhen promovuar stile jete, bazuar mbi respektin
për ambientin, duke ripohuar besën që lidhi njeriu, roje e krijimit, me Krijuesin
e tij.