Գերմանիոյ եկեղեցին կը վերակոչէ Պերլինի պատին փլուզումին 25-րդ տարեդարձը։

(Ռ.Վ. 7 նոյեմբեր 2014) 25 տարիներ անցան Պերլինի պատին փլուզումէն (8-9 Նոյեմբեր 1989) եւ Գերմանիոյ կաթողիկէ եկեղեցին կը պատրաստուի յիշատակելու այս պատմական կարեւոր դէպքը։
Գերմանական եպիսկոպոսական դասը` 8 Նոյեմբեր 2014-ին, կազմակերպած է գիտաժողով մը, որուն բնաբանն է. ''Քաջալերանք մը շնչելու երկու թոքերով'' (ներշնչուած Յովհաննէս Պօղոս Բ սուրբ Քահանայապետի խօսքէն)։
Գիտաժողովին կը նախատեսուին երեք կլոր սեղաններ. Առաջին` Պերլինի պատին փլուզումը եւ անոր հետեւանքները։ Երկրորդ` համայնավարութեան վերջը.Ի՞նչ բանի սկիզբ։ Երրորդ` Եւրոպական փորձառութիւններ ու հեռանկարներ Պերլինի պատին փլուզումէն 25 տարիներ ետք. Եկեղեցին Եւրոպայի մէջ։
Գիտաժողովին ի մէջ այլոց կը մասնակցին երկու կարդինալներ,Գերմանիոյ մօտ Լեհաստանի դեսպանը եւ Գերմանիոյ ֆինանսի նախարարը։
9 Նոյեմբերին ոգեկոչումը կը նախատեսէ համերգ մը սրբուհի Էտվիճի աթոռանիստ եկեղեցւոյ մէջ։ Գերմանիոյ զանազան քաղաքներուն մէջ եւս նախատեսուած են յիշատակումներ, ինչպէս ցուցահանդէս մը նուիրուած արեւելեան Գերմանիոյ կաթողիկէներուն։ Նշենք որ Արեւելեան Գերմանիոյ կաթողիկէները կը ներկայացնէին բնակչութեան 25 տոկոսը։