Roli i Papës Gjon Pali II në rënien e Murit të Berlinit
Rënia e Murit të Berlinit mes 8 e 9 nëntorit 1989 “Ishte rezultati i një historie
të gjatë shtypjeje dhe lufte kundër kësaj shtypjeje”, sipas fjalëve, të kancelares
gjermane Angela Merkel, shqiptuar me rastin e 20 vjetorit të rënies së Murit të Berlinit,
në një ceremoni madhështore në kryeqytetin e Gjermanisë, në të cilën morën pjesë mëse
100 mijë vetë. Po mungonte pikërisht personaliteti i padiskutueshëm që dha një kontribut
të pamohueshëm me thirrjen e tij “Mos kini frikë” dhe me udhëtimet në Poloninë e Solidarnoshit
e të Lek Valesës. Ky personalitete qe Papa Shën Gjon Pali II, simbol i qartë i fundit
të regjimeve totalitare komuniste në Evropën Lindore. Po, cili ka qenë roli
i Papës Vojtila në rënien e Murit të Berlinit, simbolit të komunizmit, e cili
është kontributi i të krishterëve në ndërtimin e Evropës? Ja çka thotë kardinali
Anxhelo Sodano. Sekretar i Shtetit të Vatikanit në kohën e papnisë së Papës polak.
Po e kujtojmë edhe librin e tij “Për një Evropë të re”: “Ra atëherë një
simbol i ndarjes së Evropës e sidomos filloi të bjerë Evropa qendro-lindore, ai sistem
komunist, që iu imponua me forcë atyre popullsive. Ishte triumfi i lirisë së popujve.
Pikërisht këtë tha Papa i ndjerë Gjon Pali II kur më vonë, në vitin 1996, vizitoi
Berlinin. Para atij Muri e para Portës së Brandeburgut, Papa Gjon Pali II tha: “Porta
e Brandeburgut është bërë Porta e lirisë”. Isha edhe unë me atë rast përkrah Papës
Wojtilla dhe e kujtoj si tani mallëngjimin e kancelarit Kohl dhe të gjithë të pranishmëve,
të cilët brohoritën stuhishëm, si për ta falënderuar Papën për kontributin e kthimit
të lirisë në zemër të Evropës. Tashmë, ky kontribut njihet nga shumica. Dua vetëm
të tregoj një dëshmi, siç mund të ishte ajo e ish-presidentit të Bashkimit Sovjetik,
Gorbaçov, në vitin 1992: “Sot – tha atëherë ai – mund të themi se gjithçka ka ndodhur
në Evropën lindore në këto vitet e fundit nuk do të ishte e mundur pa praninë e këtij
Pape (Gjon Pali II), pa rolin – edhe politik – që ai diti të luajë në skenën botërore”.
Falë Papës Shën Gjon Palit II dhe falë kontributit të shumë të krishterëve të
Evropës, 25 vjet më parë filloi të ndërtohej një Evropë e re. E cili është kontributi
i të krishterëve për “Evropën e Re”? Kardinali Sodano thotë: “Është kontributi
i atyre që punojnë për të ndërtuar baza të forta për shtëpinë e re evropiane, baza
vlerash shpirtërore. Për këtë, të gjithë të krishterët e Evropës – si katolikë, ashtu
edhe ortodoksë apo protestantë – përpiqen të bashkëpunojnë, për të ndërtuar një Evropë
të përshpirtshme. Ashtu siç thotë Papa Benedikti XVI në enciklikën “Caritas in Veritate”:
“Feja e krishterë dhe fetë e tjera mund të japin kontributin e tyre për zhvillimin,
vetëm nëse Zoti gjen vend edhe në sferën publike, duke iu referuar veçanërisht përmasës
kulturore, shoqërore, ekonomike e, sidomos, asaj politike. Doktrina shoqërore e Kishës
ka lindur për të kërkuar këtë “status qytetarie” për fenë e krishterë… Përjashtimi
i fesë nga sfera publike, ashtu si fondamentalizmi fetar, që është ekstremi tjetër,
pengon takimin ndërmjet njerëzve dhe bashkëpunimin e tyre për përparimin e njerëzimit”.