“Me anë të fesë Abrahami, kur qe grishur, dëgjoi të çohet dhe të niset drejt vendit
që do ta fitonte në trashëgim… Me anë të fesë erdhi të banojë në tokën e premtuar”
(Heb 11,8-9). Na kujtohet sot kjo
frazë e marrë nga Letra drejtuar Hebrenjve, ndërsa bota përgatitet të kremtojë 25-vjetorin
e rënies së Murit të Berlinit, “Tokë e premtuar” për të gjithë ata, që shpresonin
se një ditë Zoti do t’i shpëtonte nga kthetrat e diktatorëve të kuq e do t’u tregonte
udhën drejt një “toke” pjellore, plot me përrenj, burime, ujë që bulon nga gjiri i
dheut e që vadit fushat, ku rritet grurë, rrush, fiq, shegë, ullinj, ku ka vaj e mjaltë,
bukë me shumicë, hekur e bakër, siç përshkruhet në Librin e Ligjit të Përtërirë (8,7-10)
toka e Kanaanit, simbolikisht “tokë” e begatisë. Do t’ju flasim më specifikisht për
rënien e Murit të Berlinit, të dielën, kur është pikërisht përvjetori i rënies së
tij, por sot, për rubrikën tonë javore, na intereson më shumë kuptimi i fjalës “Tokë
e premtuar” nga pikpamja e fesë. Së pari, ajo është objekt i premtimit, që
Zoti i pati bërë Abrahamit. Në Librin e Zanafillës thuhet: “Zoti i tha Abrahamit:
Dil prej vendit tënd… në drejtim të një vendi që do të ta tregoj” (12,1). E siç
vë në dukje shkrimi i bukur i Besëlidhjes së Re, Letra drejtuar Hebrenjve, të cilën
e cituam në fillim, Abrahami u bind me fe. E fjala “fe” këtu është themelore. Historia
e Izraelit u lidh pazgjidhshëm me atë tokë, dhuruar solemnisht nga Zoti pas eksodit,
aq shumë e dashur dhe e idealizuar, sa të hyjë në Besojmën e Izraelit: “Unë jua
dhashë tokën që nuk e keni punuar, qytetet që nuk i keni ndërtuar e banoni në to”
(Jz 24,13). Por, toka është edhe impenjim për Popullin e zgjedhur e kjo shprehet
jo vetëm përmes punës së çdo fisi, pas hyrjes në atë territor, por edhe përmes fesë
në Hyjin. Është pikërisht kjo arsyeja – nevoja e përmasës fetare – që nga ana tjetër,
i hap mundësinë kulteve idhujtare, që e largojnë Izraelin nga Zoti. Kështu, në vitin
586 para Krishtit, pas shkatërrimit të Jeruzalemit nga armatat e Nabukodonosorit,
populli hebraik niset në eksodin babilonez, por kur arrin ta pastrojë idealisht shpirtin
gjatë pendesës së eksodit, i jepet mundësia të kthehet në tokën e të parëve, në një
mënyrë të tillë sa një profet i shekullit IV para Krishtit, i ashtuquajturi Isaia
i Dytë (kap. 40-55), flet për një eksod të ri çlirimtar. Në këtë dritë, toka e
Kanaanit, siç quhej nga banorët e saj të hershëm, ose Palestina (pra, Filistea, nga
emri i popullsisë së lashtë, që erdhi më pas), ose “Izrael” apo “tokë”, siç e quan
Besëlidhja e Vjetër, do të kthehet kështu në “Tokën Shenjte”, sidomos në traditën
e krishterë, në vazhdën e Librit të Urtisë, që e përdor këtë emër (12,3). Kështu,
të krishterët kanë një simbol, të cilin mund ta evokojnë gjithnjë, pavarësisht nga
territori i vërtetë gjeografik. Ai është horizonti i përsosur, i ngjashëm me Jeruzalemin
e ri qiellor, për të cilin këndohet në Librin e Zbulesës. Sërish, Letra drejtuar Hebrenjve
na jep një meditim të gjerë për këtë (3,7-4,11), duke e quajtur tokën, që presim,
tokën e fundme, si “pushimi” i plotë dhe i përsosur i të drejtëve. Kuptohet atëherë,
lumnia, për të cilën flet Jezusi: “Lum ata që janë të butë, sepse do ta trashëgojnë
tokën” (Mt 5,5). Tashmë, “toka e premtuar” nuk është më një rajon, një hapësirë,
por një horizont i ri jete e bashkimi me Zotin. E në këtë perspektivë, mund të rilexojmë
Psalmin 37: “Shpreso në Zotin e bëj mirë: kështu do të banosh në tokën e premtuar…
ata që shpresojnë në Zotin do ta trashëgojnë tokën… të butët do ta trashëgojnë tokën”
(vv. 3.9.11). Prandaj, toka e premtuar është gjithkund, edhe në rënien e atij
Muri të Berlinit, kaq të shpresuar me fe e besim se Hyji i Gjithpushtetshëm do të
realizonte një ditë, ëndrrën e të vuajturve e të butëve, që nuk iu nënshtruan komunizmit.