Papa: familja burim i nevojshëm për kulturën e solidaritetit
Familja si burim i duhur për të ushqyer solidaritetin. Papa Françesku ua kujton këtë
ipeshkvijve afrikanë të Konferencës Ipeshkëvnore të Malàvit, të cilët i priti në audiencë
në Vatikan, me rastin e vizitës së tyre ‘ad limina apostolorum’. “E di që populli
po ballafaqohet me pengesa shumë të rënda në fushën e zhvillimit, të progresit ekonomik
e të luftës për mirëqenie, po përherë duke qëndruar i rrënjosur mbi vlerat e veta
familjare”, tha Papa. E vërtet, “pikërisht në familje, me tërë aftësinë e saj specifike
e unike, kemi aftësinë për të formuar çdo anëtar, posaçërisht të rinjtë, si njerëz
dashamirës, të aftë të flijohen, të angazhohen e të jenë besnikë, në mënyrë që Kisha
dhe shoqëria e Malàvit të mund të gjejnë burimet e duhura për përtëritjen dhe ndërtimin
e kulturës së solidaritetit”. Në fjalimin e tij drejtuar ipeshkvijve të Malàvit,
Papa Bergoglio i fton prelatët “të mos i lënë anash aspektet e jetës familjare si
fëmijërinë e rininë, miqësinë, jetën martesore të të martuarve, besnikërinë e dashurinë,
marrëdhëniet ndërpersonale dhe mbështetjen e familjes“ nga ana e Kishës. Ati i Shenjtë
Françesku i porosit ipeshkvijtë afrikanë t’u “jenë pranë meshtarëve” e të “kujdesen
më mirë për formimin e tyre njerëzor, nga i cili varet formimi i mirë shpirtëror,
intelektual e baritor”. Së fundi, Papa Françesku u kërkon ipeshkvijve të Malàvit
një “vëmendje të veçantë ndaj të rinjve, që janë pjesë e çmueshme sot dhe premtim
për të ardhmen e Vendit” dhe fton Kishën ta “ketë përherë parasysh tragjedinë e shumë
të varfërve, jeta e të cilëve është pa perspektivë dhe të kujtohen për vuajtjet e
të sëmurëve, posaçërisht nga Sida, për dramën e familjarëve të tyre e të fëmijëve
jetimë”.